სახალხო დამცველის წარმომადგენელი მიხეილ ღონღაძე აცხადებს, რომ ყოფილი პრეზიდენტი მიხეილ სააკაშვილი გლდანის მე-18 დაწესებულების საავადმყოფოში იზოლირებულ პალატაში იმყოფება და პერიმეტრზე პატიმრები არ არიან. თუმცა, მისივე თქმით, სააკაშვილს ესმის პატიმრების ხმა, რომლებიც მას აგინებენ და ემუქრებიან.

ომბუდსმენის წარმომადგენელმა აღნიშნა, რომ მიხეილ სააკაშვილი რუსთავის მე-12 პენიტენციური დაწესებულებიდან გლდანის ციხის საავადმყოფოში ავტომანქანით გადაიყვანეს.

ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის მე-12 პენიტენციური დაწესებულებიდან გლდანის მე-18 დაწესებულების საავადმყოფოში დღეს, 8 ნოემბერს გადაიყვანეს.

მანამდე რუსთავის ციხესთან ვერტმფრენი გამოჩნდა, რის შემდეგაც გავრცელდა ინფორმაცია, რომ მიხეილ სააკაშვილი ციხიდან სამედიცინო დაწესებულებაში გადაჰყავდათ.

რუსთავის ციხიდან გამოსვლის შემდეგ სააკაშვილის პირადმა ექიმმა, ნიკოლოზ ყიფშიძემ განაცხადა, რომ ანალიზებზე დაყრდნობით კონსილიუმი ერთად ექსპრეზიდენტის კლინიკაში გადაყვანის აუცილებლობაზე შეთანხმდა.