ქართული ოცნების დეპუტატის, გივი მიქანაძის განცხადებით, აქვს უტყუარი ინფორმაცია, რომ საჭიროების შემთხვევაში, ციხის სამედიცინო დაწესებულება ექსპრეზიდენტის, მიხეილ სააკაშვილის მისაღებად მზად არის. ამის შესახებ მან ჟურნალისტებთან ისაუბრა.

"მსჯავრდებული სააკაშვილის უსაფრთხოება მაქსიმალურად დაცულია და დაცული იქნება, ისევე, როგორც მისი ჯანმრთელობასთან დაკავშირებული საკითხები. ის არის მუდმივად სამედიცინო პერსონალის დაკვირვების ქვეშ. როგორც ხედავთ, ყოველდღიურად ძალიან ბევრი ვიზიტორი ჰყავს მას კანონის ფარგლებში დაცული ნორმებიდან გამომდინარე და შესაბამისად, თუკი საჭიროება გახდება, ჩვენ გვაქვს უტყუარი ინფორმაცია იმის თაობაზე, რომ ბრალდებულთა და მსჯავრდებულთა მე-18 სამკურნალოდ სპეციალიზირებული დაწესებულება მზად არის, რომ მიიღოს ეს მსჯავრდებული, უზრუნველყოს მისი უსაფრთხოების სრული უზრუნველყოფა", — განაცხადა მან.

სახალხო დამცველის რწმუნებულებმა სააკაშვილის შესაძლო მიღებისთვის მე-18 დაწესებულება კიდევ ერთხელ შეამოწმეს. ომბუდსმენის განცხადებით, მიუხედავად დადებითი ცვლილებებისა, დაწესებულებაში არსებული ვითარება, სამედიცინო უზრუნველყოფის კუთხით, სრულად ისევ არ შეესაბამება ექიმთა მულტიფუნქციური ჯგუფის მიერ გაცემულ დასკვნებსა და რეკომენდაციებს.

საპატიმროში მიხეილ სააკაშვილი უკვე 36-ე დღეა შიმშილობს. მან შიმშილობა დაკავების დღიდან გამოაცხადა. მას შემდეგ, რაც ექსპრეზიდენტმა შიმშილობა დაიწყო, ექიმები აღნიშნავენ, რომ მისი ჯანმრთელობის მდგომარეობა სუსტია. მხარდამჭერები და თანაგუნდელები სააკაშვილს შიმშილობის შეწყვეტისკენ მოუწოდებენ.

პოლიტიკური პარტიები, ორგანიზაციები, სამედიცინო მუშაკები ხელისუფლებას ექსპრეზიდენტის სამოქალაქო კლინიკაში გადაყვანისკენ მოუწოდებენ. თუმცა ქართული ოცნება ამაზე უარს ამბობს. ხელისუფლების განცხადებით, პენიტენციურ დაწესებულებაში შექმნილია ყველა პირობა იმისთვის, რომ პატიმარს უმკურნალონ. იუსტიციის მინისტრის, რატი ბრეგაძის თქმით, საჭიროების შემთხვევაში სააკაშვილს სწორედ ციხის სამედიცინო განყოფილებაში გადაიყვანენ. ამის წინააღმდეგია ექსპრეზიდენტი და ამბობს, რომ როგორიც არ უნდა იყოს მისი ჯანმრთელობის მდგომარეობა, უარს აცხადებს ციხის საავადმყოფოში გადაყვანაზე.