NATO-ს ყოფილი გენერალური მდივნის, ჯორჯ რობერტსონის განცხადებით, რუსეთის პრეზიდენტს, ვლადიმერ პუტინს ალიანსში გაწევრიანება მმართველობის დასაწყისშივე სურდა. თუმცა როგორც რობერტსონმა აღნიშნა, პუტინს არ უნდოდა გაევლო განაცხადის ჩვეული პროცესი და რიგში მდგარიყო "უმნიშვნელო" ქვეყნებთან ერთად. ამის შესახებ The Guardian წერს.

რობერტსონის თანახმად, პუტინმა მათი შეხვედრის პირველივე დღეს მკაფიოდ აჩვენა, რომ უნდოდა რუსეთი დასავლეთ ევროპის ნაწილი ყოფილიყო.

"მათ სურდათ, რომ ყოფილიყვნენ იმ დაცული, სტაბილურად წარმატებული დასავლეთის ნაწილი, რომელიც რუსეთი არ ყოფილა", — უთხრა გამოცემას რობერტსონმა.

როგორც ის იხსენებს, რუსეთის პრეზიდენტმა შეხვედრაზე ჰკითხა, როდის მიიწვევდნენ ალიანსში, რაზეც რობერტსონმა უპასუხა, რომ ქვეყნებს არ იწვევდნენ და ისინი თავად აკეთებდნენ განაცხადს. მისი თქმით, აღნიშნულზე პუტინმა უპასუხა, რომ არ აპირებდა რიგში დგომას ქვეყნებთან, რომლებსაც მისი თქმით, მნიშვნელობა არ ჰქონდა.