დაავადებათა კონტროლის ეროვნული ცენტრის დირექტორის მოადგილე, პაატა იმნაძე აცხადებს, რომ თუ მოსახლეობის ვაქცინაცია ასეთი ტემპით გაგრძელდება, კორონავირუსი სულ იქნება.

"ეს დაავადება ჩვენ არ მოგვშორდება. დიდი ცუდი პროგნოზი შეიძლება იყოს, რომ ძალიან ბევრ ქვეყანას ეს მოშორდება და ჩვენ კიდევ არ მოგვშორდება. იმიტომ, რომ ასეთი ტემპით თუ ავიცრებით, სულ იქნება ეს კორონა", — თქვა მან საკოორდინაციო საბჭოს დასრულების შემდეგ.

4 ნოემბრის მონაცემებით, საქართველოში კორონავირუსის 5 206 ახალი შემთხვევა დადასტურდა, გამოჯანმრთელდა — 4 648, ხოლო გარდაიცვალა — 53 ადამიანი.

დღეის მდგომარეობით, სულ ქვეყანაში სულ 1 990 501 ადამიანია ვაქცინირებული, დღიურად აიცრა — 3 469.

საქართველოში ამ დროისთვის 3 სხვადასხვა ვაქცინაა ხელმისაწვდომი.

ვაქცინაციის პროგრამაში ჩართვა შეუძლია ყველა მსურველს, 16 წლის ზემოთ. გარდა ამისა, ქრონიკული დაავადებების ან საზღვარგარეთ წასვლის აუცილებლობის შემთხვევაში, აცრას შეძლებენ 12-წლიდან ბავშვებიც.

უკვე შესაძლებელია ბუსტერითა და ჩანაცვლებით სარგებლობაც. დეტალები ნახეთ აქ: ვინ მიიღებს, როდის და როგორ — რა უნდა ვიცოდეთ ბუსტერსა და ჩანაცვლებაზე

ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.