"სახალხო არტისტების" საბიუჯეტო დაფინანსება იზრდება და ისინი "სახალხო მხავტრებთან" და რუსთაველის პრემიის ლაურეანტებთან ერთად, 400 ლარის ნაცვლად, 600-ლარიან სტიპენდიას მიიღებენ.

ამის შესახებ ცნობილი ხდება პრემიერმინისტრ, ირაკლი ღარიბაშვილის მიერ ხელმოწერილი დადგენილებიდან. დოკუმენტი მიმდინარე წლის 2 ნოემბრით თარიღდება და 2011 წელს მიღებულ იმავე შინაარსის დადგენილებაში შესატან ცვლილებებს ითვალისწინებს.

"სახალხო არტისტებს, სახალხო მხატვრებსა და შოთა რუსთაველის სახელობის პრემიის ლაურეატებს დაენიშნოთ ყოველთვიური სტიპენდია 600 ლარის ოდენობით. სახალხო არტისტებს ან სახალხო მხატვრებს, რომელთაც იმავდროულად მინიჭებული აქვთ შოთა რუსთაველის სახელობის პრემიის ლაურეატის წოდება, ყოველთვიური სტიპენდიის ოდენობა ორივე წოდებისათვის განესაზღვროთ 600 ლარის ოდენობით", — ვკითხულობთ დადგენილებაში.

დოკუმენტის მიხედვით, ოლიმპიური და პარალიმპიური თამაშებისა და საჭადრაკო ოლიმპიადების პრიზიორები 800-ლარიან, ხოლო ბრინჯაოს მედლის მფლობელიები 500-ლარიან სტიპენდიას მიიღებენ. წინა დადგენილების მხიედვით, ეს პუნქტი საჭადრაკო ოლიმპიადის პრიზიორებს არ ეხებოდათ.

გარდა ამისა, 2 ნოემბერს ხელმოწერილ დადგენილებაში ნათქვამია, რომ საჭადრაკო ოლიმპიადაში გამარჯვებული, რომელიც იმავდროულად არის საჭადრაკო ოლიმპიადის პრიზიორი, ყოველთვიური სტიპენდიის სახით 2 000 ლარს მიიღებს. ამასთან, ახალი დადგენილებით, საჭადრაკო ოლიმპიადის ვერცხლის მედლის მფლობელი, რომელიც იმავდროულად არის საჭადრაკო ოლიმპიადის ბრინჯაოს მედლის მფლობელი, ყოველთვიური სტიპენდიის ოდენობა 800 ლარით განესაზღვრება.

დადგენილებაში ცვლილება 2019 წლის ოქტომბერსა და მიმდინარე წლის იანვარშიც შევიდა. 2019 წელს შესული ცვლილების მიხედვით, ოლიმპიურ ჩემპიონებს, პარაოლიმპიურ თამაშებსა და საჭადრაკო ოლიმპი­ადებში გამარჯვებულებს 1 000-ლარიანი ყოველთვიური სტიპენდია დაენიშნათ.

აღნიშნული პირებისთვის გამოყოფილ სტიპენდიებს საქართველოს კულტურის, სპორტისა და ახალგაზრდობის სამინისტროს ბიუჯეტი დააფინანსებს.