ოპოზიციური კოალიციის წევრის, ელენე ხოშტარიას განცხადებით, ოპოზიციის მიერ თბილისში, თავისუფლების მოედანსა და რუსთაველის გამზირზე დაანონსებული აქცია 7 ნოემბერს არ გაიმართება.

"7-ში არ იქნება, მოდი პირდაპირ გავხსნი კარტებს, 7-ში არ იქნება ნამდვილად, ნიკამ კვირა თქვა, თუმცა მე ახლა ნიკას მაგივრად ვერ ვიტყვი, ნამდვილად გადაწყვეტილია, იქნება ნამდვილად, ან 6-ში, ან 8-ში, ანუ არ გადაიწევს რაღაცა სხვა ციკლში, უბრალოდ 7-ში არ იქნება, იმიტომ, რომ 7-ში არ უნდა იყოს" — თქვა მან TV პირველის ეთერში.

დღეს ნიკა მელიამ აქცია დააანონსა, რომელიც, მისი თქმით, კვირას გაიმართება. თუმცა ნაციონალური მოძრაობის თავმჯდომარეს თარიღი არ დაუკონკრეტებია. On.ge დაუკავშირდა პარტიის პრესსამსახურს, სადაც დაგვიდასტურეს, რომ აქცია იგეგმება ზუსტად ერთ კვირაში, 7 ნოემბერს.

ამასთან, ნაციონალური მოძრაობის Facebook გვერდზე დღევანდელი აქციის ფოტოები გამოქვეყნდა, სადაც ეწერა, რომ აქცია 7 ნოემბერს გაიმართება. მოგვიანებით, პოსტში შესწორება შეიტანეს და 7 ნოემბერი წაშალეს.

დღევანდელი აქცია ოპოზიციამ ცესკოს მიერ არჩევნების მეორე ტურის შედეგების გამოქვეყნების შემდეგ დაგეგმა. თბილისის მერობის კანდიდატმა პარლამენტთან შეკრებილებს სამოქმედო გეგმა გააცნო. მისი თქმით, უკან დახევას არ აპირებენ — სამშაბათს ბათუმში ჩავლენ, რათა ადგილზე გააპროტესტონ, შემდეგ ქუთაისში და სხვა ქალაქებში, კვირას კი აქცია თბილისში გაიმართება.