საქართველოდან შენგენის ზონაში მიმავალმა საქართველოს მოქალაქეებმა, უვიზო რეჟიმის ამოქმედების შემდეგ, უპრობლემოდ გადალახეს ქვეყნის საზღვრები. ამის შესახებ On.ge-ს საგარეო საქმეთა სამინისტროში განუცხადეს.

მათი ინფორმაციით, ევროკავშირის სივრცეში პირველი უვიზო მგზავრები უკვე მიიღეს ვარშავაში, ბუდაპეშტში, სალონიკსა და ლარნაკაში. ამ ქვეყნებში საქართველოს საკონსულო დაწესებულებების ხელმძღვანელები საქართველოს მოქალაქეებს აეროპორტში დახვდნენ.

„პირადად დავხვდი ქართველ მგზავრებს სასაზღვრო გამშვებ პუნქტთან, სადაც შესაძლებლობა მქონდა თვალი მედევნებინა ამ პროცესისთვის. თითოეულ მათგანს მივულოცე ეს ისტორიული დღე, რომელსაც სრულიად საქართველო დიდი ხანია ელოდა. აღსანიშნავია, რომ უნგრელი მესაზღვრეები განსაკუთრებული კეთილგანწყობით გამოირჩეოდნენ საქართველოს მოქალაქეების მიმართ,“- თქვა, საქართველოს მოქალაქეების დახვედრის შემდეგ უნგრეთში, კონსულის მოვალეობის შემსრულებელმა ბექა მაკარიძემ.

საქართველოს მოქალაქეებისთვის შენგენის ზონაში უვიზო მიმოსვლა დღეიდან ამოქმედდა.