სახელმწიფო სერვისების განვითარების სააგენტოს განცხადებით, ენმ-ს მიერ გავრცელებული ინფორმაცია ყალბ დოკუმენტებთან დაკავშირებით, სიმართლეს არ შეესაბამება. უწყებაში აცხადებენ, რომ მოქალაქე ედუარდი მსტოიანი ამომრჩეველთა ერთიან ბაზაში მხოლოდ ერთი მონაცემითაა შეყვანილი.

მათი თქმით, ედუარდ მსტოიანმა 22 ოქტომბერს ანა ჯიქურთან ქორწინების რეგისტრაციის შემდეგ მიიღო ცოლის გვარი — ჯიქური და ეს პროცესი ცესკოსთვის საარჩევნო სიის გადაცემის შემდეგ განხორციელდა.

"იგი საარჩევნო სიაში ძველი სახელით და გვარით არის დაფიქსირებული. აქვე განვმარტავთ, რომ ახალი პირადობის ელექტრონული მოწმობის აღების შემდეგ, მიმდინარე წლის 22 ოქტომბერს, ძველი პირადობის მოწმობა გაუქმდა", — წერია სააგენტოს განცხადებაში.

ენმ-ს ბრიფინგზე თამარ კორძაიამ განაცხადა, რომ პარტიის დამკვირვებლებმა გაყალბებული დოკუმენტით ხმის მიცემის ფაქტი აღმოაჩინეს. კერძოდ, საუბარია ნაძალადევის ერთ-ერთ უბანზე და ყალბ პირადობის მოწმობაზე.

დღეს, 30 ოქტომბერს ადგილობრივი თვითმმართველობის არჩევნების მეორე ტური იმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში აირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.