ქართული ოცნების თავმჯდომარის, ირაკლი კობახიძის განცხადებით, 29 ოქტომბერს სახელმწიფო უსაფრთხოების სამსახურის მიერ გამოქვეყნებული ჩანაწერები მხოლოდ ნაწილია და დანარჩენიც გამოქვეყნდება.

"ასევე, აღინიშნა, რომ ეს ჩანაწერი არის მხოლოდ ერთ-ერთი მტკიცებულება ამ საქმეში, დაელოდეთ. მოსმენა განხორციელდა ოფიციალურად ორდერის საფუძველზე. ამაზეც ისაუბრა უსაფრთხოების სამსახურმა. გამოქვეყნდა უკვე ნაწილი, დანარჩენიც გამოქვეყნდება", — განაცხადა კობახიძემ.

სახელმწიფო უსაფრთხოების სამსახურმა 29 ოქტომბერს განაცხადა, რომ ექსპრეზიდენტ მიხეილ სააკაშვილის ჯანმრთელობის მდგომარეობის გაუარესების შემთხვევაში მისი გლდანის #8 სასჯელაღსრულების დაწესებულებაში გადაყვანის დროს ხელისშეშლა იგეგმებოდა. უწყებამ გამოძიება სახელმწიფო ხელისუფლების დამხობის მიზნით შეთქმულების საქმეზე დაიწყო.

სუს-ის თანახმად, საუბარი იყო აღნიშნული სასჯელაღსრულების დაწესებულებასთან მისასვლელი საავტომობილო გზების სხვადასხვა საშუალებით ბლოკირებასთან. უწყებაში, ასევე, ამბობენ, რომ მსგავს ქმედებებს მიხეილ სააკაშვილის სხვა დაწესებულებებში გადაყვანის დროსაც შესაძლოა ჰქონდეს ადგილი.

უწყების წარმომადგენელმა ბრიფინგზე აუდიო მასალა წარმოადგინა, რომელიც სუს-ის მტკიცებით სასამართლო განჩინების საფუძველზე არის მოპოვებული. მათივე თქმით, საუბარი მიხეილ სააკაშვილის საპრეზიდენტო ბიბლიოთეკაში მიმდინარეობს. ჩანაწერი 2-საათიანია და თანდართული აქვს სისხლის სამართლის საქმეს.