თბილისის მერობის არჩევნების მეორე ტურში ვერგადასული კანდიდატი, გიორგი გახარია საარჩევნო უბანზე უკვე იმყოფებოდა, თუმცა ხმა არსებულ კანდიდატთაგან არცერთს არ მისცა. როგორც გახარია ამბობს, მან ხმა მისცა საქართველოსთვის, რაც, მისივე განმარტებით ნიშნავს, რომ ორ ცუდს შორის არჩევანი არ გააკეთო.

"რა თქმა უნდა, მე ჩემი მოქალაქეობრივი ვალდებულება უნდა მომეხადა. მე მოვიხადე ეს ვალდებულება და ხმა მივეცი საქართველოსთვის [...] საქართველოსთვის რა არის იცით? როდესაც ჩვენ საქართველოს მოქალაქეებს არჩევანს გვართმევენ, როდესაც ორი პარტია გვიმტკიცებს, რომ მეორე უფრო უარესია, ვიდრე თვითონ და საერთოდ, გვაიძულებენ რომ არჩევანი გავაკეთოთ ცუდს და ცუდს შორის, მე, რა თქმა უნდა, ხმას ვაძლევ საქართველოსთვის.

საქართველოსთვის ნიშნავს იმას, რომ როდესაც ჩვენ გვაიძულებენ ორ ცუდს შორის ერთი ავირჩიოთ, უფრო უარესი კი არა, ორ ცუდს შორის ერთი ავირჩიოთ, რა თქმა უნდა, მე არც ერთს ხმას არ მივცემ", — განაცხადა გიორგი გახარიამ.

კითხვას, გადახაზა თუ არა მან ორივე კანდიდატი, გახარიამ ასე უპასუხა:

"გიპასუხეთ უკვე".

აღსანიშნავია, რომ პირველ ტურში ხმის მიცემის შემდეგ გიორგი გახარიამ კითხვაზე, იქნება თუ არა მეორე ტურში, ასე უპასუხა:

"მე ყველგან ვიქნები".

დღეს საქართველოში ადგილობრივი თვითმმართველობის არჩევნების მეორე ტური იმართება. კენჭისყრის შედეგად 5 თვითმმართველი ქალაქისა და 15 მუნიციპალიტეტის მერი, ასევე, 24 საარჩევნო ოლქში 42 მაჟორიტარი უნდა აირჩეს.

თბილისის მერობის არჩევნების მეორე ტურში ქართული ოცნების კანდიდატი, კახა კალაძე და ნაციონალური მოძრაობის კანდიდატი, ნიკა მელია გადავიდნენ.