ოსკარის ნომინანტი The Danish Girl, რომელშიც მთავარ როლებს ედი რედმეინი და ალისია ვიკანდერი ასრულებენ ინდოეთში აიკრძალა.

ტომ ჰუპერის ფილმი გასულ კვირას უნდა გასულიყო ერთ-ერთ არხზე, თუმცა ის ბადიდან მოხსნეს და მიზეზად "სენსიტიურობა" დაასახელეს, რომელიც ინდოელი მაყურებლისთვის "შეუფერებელია".

ამ სამწუხარო ამბავს Sony Le PLEX -იც გამოეხმაურა და მწუხარება გამოთქვეს, რომ ინდოეთში ასეთი ცენზურა დააწესეს.

"მთელი ისტორია აგებულია იმაზე, რომ მამაკაცს სურს სქესის შეცვლა. ეს საკმაოდ სენსიტიური და შეუფერებელი თემაა, რომელსაც ჩვენ ეთერში ვერ გავუშვებთ", - ამბობს აკრძალვის ერთ-ერთი მომხრე.

კინოსურათის აკრძალვამ დიდი უკმაყოფილება გამოიწვია ინდოელ მოსახლეობაში, რომლებიც წერდნენ, რომ თალიბანიზაცია ახლოს არის.

ფილმში მოთხრობილი ამბავი დევიდ ესბერშოფის ამავე სახელწოდების რომანს ეფუძნება, რომელიც 2000 წელს დაიბეჭდა და უამრავი პრიზის მფლობელი გახდა. ესბერშოფის შთაგონების წყარო კი ლილი ელბას ავტობიოგრაფია გახდა, რომელიც 1933 წელს გამოიცა. ეს არის მძიმე ისტორია, რომელიც მოგვითხრობს მხატვრების ეინარ უეგენერისა (მოგვიანებით ლილი ელბა) და მეუღლის გერდა უეგენერის ცხოვრებასა და ურთიერთობაზე.

ეინარმა და გერდამ ერთმანეთი კოპენჰაგენის ხელოვნების სკოლაში გაიცნეს და 1904 წელს იქორწინეს. ეინარი საკუთარ თავს ყოველთვის ქალად მიიჩნევდა, მაგრამ ამაში მაშინ დარწმუნდა, როდესაც მეუღლის სურათის პოზირებისას ქალის სამოსს ისინჯავდა. ეინარი ლილის სახელით ესწრებოდა სხვადასხვა ღონისძიებებს და ამბობდა, რომ ეინარის ბიძაშვილი იყო. თავიდან ეს ყველაფერი ეინარსაც და გერდასაც მხოლოდ თამაში ეგონათ, მაგრამ მოგვიანებით ეინარი მიხვდა, რომ აღარ შეეძლო მამაკაცის სხეულში ცხოვრება.

ფილმი ოსკარის ოთხ ნომინაციაზე წარადგინეს, აქედან ერთი საუკეთესო მსახიობი ქალის მეორეხარისხოვანი როლისთვის ალისია ვიკანდერს გადაეცა.