პარტია სამართლიანობისთვის ლიდერი, ეკა ბესელია აცხადებს, რომ ყოფილმა პრეზიდენტმა მიხეილ სააკაშვილმა, საკუთარ თავსაც და მთავრობასაც შიმშილობით "წამზომი ჩაურთო". მისი თქმით, ეს არის ღია რევოლუციური სცენარი

"მმართველი პარტია მაგ დაშვებით მოქმედებს, მაგ დათქმით მოქმედებს, რომ [არჩევნები] გადააგოროს. სააკაშვილმაც ხომ ეგ გათვალა, რომ ამ გადაგორების შესაძლებლობას არ აძლევს — ჩაურთო წამზომი თავისი შიმშილობის აქტით საკუთარ თავსაც და ხელისუფლებასაც. ეს იმას ნიშნავს, რომ ძალიან ლიმიტირებული დროა. ამ დროში ის საზოგადოებას და ამომრჩეველსაც ეუბნება — "ახლა თუ რამე შეგიძლია, შეცვალე, აგერ გაქვს კონკრეტული პოლიტიკური კალენდარი, აი რამდენიმე დღეში, შაბათს უნდა მიხვიდე და არჩევანი გააკეთო". თუ ამას ვერ აკეთებ, ის ამაზე გააზრებულად მიდის და შეიძლება ძალიან მძიმედაც დასრულდეს. ეს არის, ამას თავის სახელს დავარქმევ, არის ღია რევოლუციური სცენარი", — თქვა ბესელიამ ფორმულას ეთერში.

მიხეილ სააკაშვილი პირველ ოქტომბერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა. ის 26 დღეა შიმშილობს.

ექსპრეზიდენტის ექიმი და ადვოკატები მის სათანადოდ აღჭურვილ სამოქალაქო კლინიკაში გადაყვანას ითხოვენ. მათი თქმით, პენიტენციური სამსახურის მე-18 სამედიცინო დაწესებულება არ არის აღჭურვილი იმ აპარატურით, რაც საჭიროა მიხეილ სააკაშვილის ჯანმრთელობის მონიტორინგისა და მკურნალობისთვის.

მისი პირადი ექიმის, ნიკოლოზ ყიფშიძის განცხადებით, სააკაშვილი გლდანის ციხეში მკურნალობის კატეგორიულად წინააღმდეგია. ექიმის ცნობით, კონსილიუმი თანხმდება, რომ საჭიროების შემთხვევაში, ექსპრეზიდენტი მრავალპროფილურ, მაღალი კლასის კლინიკაში უნდა გადაიყვანონ.

სახალხო დამცველიც მიიჩნევს, რომ ციხის საავადმყოფო სრულად არ შეესაბამება ექიმთა კონსილიუმის რეკომენდაციებს და ამასთან, არსებობს რისკები ექსპრეზიდენტის უსაფრთხოებაზეც.

ჯანდაცვის მინისტრის, ეკატერინე ტიკარაძის მტკიცებით, მიუხედავად იმისა, რომ მე-18 სამედიცინო დაწესებულებას არ აქვს გადაუდებელი მიღების შესაძლებლობა, ის სრულადაა აღჭურვილი იმისთვის, რომ საჭიროების შემთხვევაში, მიხეილ სააკაშვილი მიიღოს. იგივე პოზიცია აქვს იუსტიციის სამინისტროსაც.

პრემიერმინისტრი ირაკლი ღარიბაშვილი კი ამტკიცებს, რომ სააკაშვილს აქვს "ილუზიები", თითქოს კერძო კლინიკაში გადაყვანის შემთხვევაში, 30 ოქტომბერს მისი მხარდამჭერები მობილიზდებიან და გაათავისუფლებენ. რაც შეეხება სააკაშვილის კერძო საავადმყოფოში გადაყვანას, ღარიბაშვილი აცხადებს, რომ ციხის საავადმყოფოში ყველა პირობა არის შექმნილი და ეს გადაწყვეტილება "არ გადაიხედება".