საქართველოს დამოუკიდებლობის 25 წლისთავი ქვეყნის პრემიერმინისტრმა, გიორგი კვირიკაშვილმა საქართველოს ყველა მოქალაქეს მიულოცა და თქვა, რომ საქართველო სამომავლო წარმატებას მიაღწევს აფხაზებთან და ოსებთან ერთად. პრემიერმა 26 მაისი განსაკუთრებით მიულოცა ქართულ ჯარს:

"დღევანდელ დღეს ვულოცავ ჩვენს საერთაშორისო პარტნიორებს, მათ, ვისაც დიდი წვლილი მიგიძღვით ჩვენი ქვეყნის დამოუკიდებლობის განმტკიცებაში. განსაკუთრებით გილოცავთ თქვენ, საქართველოს ჯარისკაცებო.

დღევანდელი დღე გამორჩეულად ამაღელვებელია წვევამდელებისათვის. დღეს თქვენ დადეთ ფიცი სამშობლოს წინაშე და გახდით ჩვენი ქვეყნის ჯარისკაცები. მე მჯერა, რომ თქვენ პირნათლად მოიხდით ვალს სამშობლოს წინაშე და არასდროს დაივიწყებთ, რის ფასად მოიპოვა ჩვენმა ქვეყანამ ეს დამოუკიდებლობა. არასდროს დაივიწყებთ მათ, ვინც სიცოცხლე შესწირა ჩვენი ქვეყნის დამოუკიდებლობას.

საქართველოს სამსახური ყველაზე დიდი პატივია. დარწმუნებული ვარ, თითოეული თქვენგანი ჩვენი ქვეყნის ერთგული ჯარისკაცი იქნება და ყოველთვის გემახსოვრებათ, რომ თქვენს ზურგს უკან ჩვენი სამშობლო, ჩვენი საქართველოა

დამოუკიდებლობის დღეს ვულოცავ საქართველოს შეიარაღებულ ძალებს - ჩვენი ქვეყნის ერთგულ ჯარისკაცებს, განსაკუთრებით საერთაშორისო მისიებში მონაწილე სამხედროებს, რომლებიც საქართველოს სახელმწიფოს იცავენ, იცავენ მშვიდობას მსოფლიოში. მადლობა მათ ქვეყნის ერთგულებისათვის და მსოფლიოში ქართველი ჯარისკაცების უშიშარ და თავდადებულ მეომრებად წარმოჩენისთვის.

ამ 25 წლის განმავლობაში საქართველომ რთული გზა განვლო, დიდი მსხვერპლი გაიღო. პატივს მივაგებ სამშობლოსთვის დაღუპული გმირების ხსოვნას. მეგობრებო, ჩვენს სამშობლოს ბევრი ტკივილი და გამარჯვება უნახავს, მაგრამ დღევანდელი დღე, მიღწევები და პერსპექტივები იმის გარანტიაა, რომ ვიცხოვრებთ უკეთეს, ერთიან და ძლიერ საქართველოში. ჩვენს ქვეყანას წინ აქვს დიდი წარმატებები და გამარჯვებები.

მე დარწმუნებული ვარ, რომ ამ წარმატებას ჩვენ აფხაზ და ოს ძმებთან ერთად მივაღწევთ. შევძლებთ ტკივილის დაძლევას და უკეთესი მომავლისკენ ერთად განვაგრძობთ გზას.

მეგობრებო, სამშობლოს ჯარისკაცებო, კიდევ ერთხელ გილოცავთ დღევანდელ დღეს და გისურვებთ მშვიდობას. ღმერთი იყოს თქვენი და მთელი საქართველოს მფარველი".

დღეს, 26 მაისს, საქართველო დამოუკიდებლობის 25-ე წლისთავს აღნიშნავს.