დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის, ამირან გამყრელიძის ინფორმაციით, კორონავირუსით გარდაცვლილთა 99% აუცრელი იყო. ეს განცხადება გამყრელიძემ ვაქცინაციის კამპანიის ფარგლებში, ძალადობის მსხვერპლთა მომსახურების კრიზისულ ცენტრში სტუმრობისას გააკეთა.

"ეს სამკვდრო-სასიცოცხლო ბრძოლაა უხილავ მტერთან. ვაქცინაცია ჩვენი მთავარი იარაღია, რომელიც გამარჯვებას მოგვიტანს. კორონავირუსით გარდაცვლილთა თითქმის 99 პროცენტი აუცრელი იყო. ვაქცინებზე წვდომის გასაზრდელად, მთელი ქვეყნის მასშტაბით ვაქცინაციის მარათონი დავიწყეთ, რომელიც მოსახლეობის ყველაზე მოწყვლად ჯგუფებს მისწვდება", — განაცხადა ამირან გამყრელიძემ.

კრიზისულ ცენტრში გამყრელიძის გარდა იმყოფებოდნენ ჯანდაცვის მინისტრის მოადგილე თამარ ბარკალაია, სახელმწიფო ზრუნვის სააგენტოს დირექტორი მერი მაღლაფერიძე, გაეროს განვითარების პროგრამის (UNDP) ხელმძღვანელის მოადგილე ანნა ჩერნიშოვა და შვედეთის ელჩი ულრიკ თიდესტრომი.

შეხვედრას მობილური სამედიცინო ბრიგადა ესწრებოდა და მსურველებს შესაძლებლობა ჰქონდათ ადგილზევე აცრილიყვნენ. შეხვედრის შემდეგ 20-მდე პირი აიცრა.

ფოტო: NCDC