ექსპრეზიდენტის, მიხეილ სააკაშვილის ადვოკატის, დიმიტრი საძაგლიშვილის განცხადებით, დარწმუნებულია, რომ სააკაშვილის სასამართლო პროცესებს მხოლოდ მას შემდეგ ჩანიშნავენ, რაც მისი დაცვის ქვეშ მყოფი, ჯანმრთელობის მდგომარეობის გამო, მონაწილეობას ვეღარ შეძლებს.

"ეს არის შეშინებული ხელისუფლების სახე, რომელიც 8 წელია გვიმტკიცებდა, რომ თურმე, მართლმსაჯულების წინაშე უნდა წამდგარიყო სააკაშვილი და 20 დღეა დაპატიმრებული ჰყავთ ადამიანი, ყოველდღიურად ვითხოვ პროცესის ჩატარებას და დღემდე პროცესი არ ჩანიშნეს. ახალ ბრალზეც, დარწმუნებული ვარ, რომ პროცესს ჩანიშნავენ მხოლოდ მას შემდეგ, რაც მიხეილ სააკაშვილს ფიზიკურად აღარ შეეძლება სასამართლო პროცესში მონაწილეობის მიღება", — განაცხადა საძაგლიშვილმა.

მიხეილ სააკაშვილი 21-ე დღეა შიმშილობს. 19 ოქტომბერს ჯანდაცვის სამინისტროს ბაზაზე შექმნილმა ექიმთა მულტიფუნქციურმა ჯგუფმა სააკაშვილის ციხეში პირველად მოინახულა და მისი პროფილაქტიკური ჰოსპიტალიზაციის რეკომენდაცია გასცა. იმავე დღეს, სააკაშვილის პირადმა ექიმმა, ნიკოლოზ ყიფშიძემ განაცხადა, რომ ექსპრეზიდენტის ნებართვის შემთხვევაში მას, სავარაუდოდ შაბათს, კლინიკაში გადაიყვანენ.

გუშინ, 20 ოქტომბერს მიხეილ სააკაშვილმა ციხიდან მორიგი წერილი გამოაგზავნა, სადაც წერის, რომ შიმშილობას არ შეწყვეტს, მაგრამ ექიმების მხრიდან მედიკამენტოზურ ჩარევაზე თანახმაა.