ნაციონალური მოძრაობის წევრი, ირაკლი აბესაძე ოპოზიციიდან თბილისის მერის მოადგილეობის კანდიდატი იქნება. აღნიშნულზე კოალიციური გუნდის წევრების წარდგენისას ერთიანი ნაციონალური მოძრაობის თავმჯდომარემ და თბილისის მერობის კანდიდატმა, ნიკა მელიამ განაცხადა.

"მინდა წარმოგიდგინოთ ადამიანი, რომელიც ჩემი მეგობარია, რომელიც კვალიფიციურია. მას საზოგადოების დიდი ნაწილი იცნობს. იგი არის ერთ-ერთი ყველაზე წარმატებული ადამიანი თბილისის მთავრობების ისტორიაში. ბევრი რამ უკეთებია, ბევრ რამეს კიდევ ძალიან მალე გააკეთებს. თბილისის მერის მოადგილეობის კანდიდატი ირაკლი აბესაძე", — განაცხადა მელიამ მისი წარდგენისას.

აბესაძის განცხადებით, გამარჯვების შემთხვევაში ისინი აპირებენ მისცენ თბილისს განვითარების შესაძლებლობა, დაასრულონ თბილისის შემოვლითი რკინიგზის პროექტი.

"რა თქმა უნდა, ჩვენ თბილისს მივცემთ განვითარების შესაძლებლობას და გავიტანთ სატვირთო რკინიგზას თბილისიდან, დავასრულებთ თბილისის შემოვლითი რკინიგზის პროექტს. რა თქმა უნდა, ჩვენ განვავითარებთ სატრანსპორტო კავშირებს მდინარე მტკვარზე და დავამატებთ მინიმუმ 2 ახალ ხიდს, ესაა — ვეფხი და მოყმესთან და ქსნის ქუჩის გაგრძელებაზე. რა თმა უნდა, ძალიან მნიშვნელოვანია, რომ თბილისში დაინერგოს ეკოლოგიურად ბოლომდე სუფთა, ძალიან სწრაფი და კიდევ უფრო ტევადი ტრანსპორტი, ტრამვაი და განსაკუთრებით ვფიქრობთ განვავითაროთ ეს დიდი დიღმის მიმართულებით, უბნის, რომელიც განსაკუთრებით ვითარდება ბოლო წლების განმავლობაში", — განაცხადა აბესაძემ.

ოპოზიციის გამარჯვების შემთხვევაში, დედაქალაქის მერის მოადგილეები იქნებიან მამუკა ხაზარაძე, ზურაბ ჯაფარიძე, ელენე ხოშტარია და ირაკლი აბესაძე.

სამსახურების ხელმძღვანელობის კანდიდატების ჩამონათვალი ასე გამოიყურება:

• ჯანდაცვისა და სოციალური მომსახურების სამსახურის ხელმძღვანელი — სოფო ჯაფარიძე;
• კულტურის, განათლების, სპორტისა და ახალგაზრდობის საქმეთა სამსახურის ხელმძღვანელი — მედეა მეტრეველი;
• ანტიკორუფციული მიმართულება — გიორგი ნონიაშვილი;
• შესყიდვების სამსახურის ხელმძღვანელი — მამუკა აჩბა;
• მუნიციპალური ინსპექციის ხელმძღვანელი — დიმიტრი ბიძინაშვილი;
• იურიდიული სამსახურის ხელმძღვანელი — გიგა ლემონჯავა;
• მერიის ადმინისტრაციის ხელმძღვანელი — დავით ლაგვილავა;
• ტრანსპორტის სააგენტოს ხელმძღვანელი — ვასო ურუშაძე;
• თბილის განვითარების ფონდის ხელმძღვანელი — ნიკა ვაჩეიშვილი;
• თბილსერვის ჯგუფის ხელმძღვანელი — ბესო გაზდელიანი;
• გლდანის გამგებელი — თენგიზ გიორგაძე;
• ნაძალადევის გამგებელი — ლერი დემეტრაშვილი;
• დიდუბის გამგებელი — დავით ნაფეტვარიძე;
• ჩუღურეთის გამგებელი — კახა ჟღენტი;
• ვაკის გამგებელი — საბა ბუაძე;
• საბურთალოს გამგებელი — ოთარ თავართქილაძე;
• ისნის გამგებელი — ლანა გალდავა;
• სამგორის გამგებელი — გულიკო ზუმბაძე;
• კრწანისის გამგებელი — რომეო ფარულავა;
• მთაწმინდის გამგებელი — თამაზ დათუნაშვილი;
• არქიტექტურის სამსახურის ხელმძღვანელი — ანა ბიბილაშვილი;