რუსთავი 2-ის გენერალური დირექტორის, ნიკა გვარამიას განცხადებით, ისინი იღებენ ძმები ყარამანიშვილების შეთავაზებას და ორშაბათს დააფუძნებენ ახალ შპს-ს, რომლის სახელი იქნება რუსთავი 2-ის გუნდი. გვარამიას თქმით, სწორედ ეს გუნდი იქნება შპს საქართველოს 51 პროცენტრის მფლობელი:

"51 პროცენტის ადამიანებზე ასე დანაწილება უფრო ცოტა მანევრის საშუალებას იძლევა, ხოლო 51 პროცენტის მფლობელი კომპანიის 100 პროცენტის დანაწილება, უფრო მეტი მანევრის შესაძლებლობას იძლევა. ის თუ ვინ იქნება ამ გუნდში, და რამდენი ადამიანი დააფუძნებს, ეს უნდა გადაწყვიტოს კოლექტივმა. ამას გადავწყვიტავთ დღეს, სრულ შეკრებაზე, 7 საათზე და რამდენი იქნება, ვინ იქნებიან, როგორი წესით შეირჩევიან, დღეს გაირკვევა".

ნიკა გვარამიას შეფასებით, ძმები ყარამანიშვილების შეთავაზება არის უპრეცენდენტო და არხის ფაქტობრივად საკონტროლო პაკეტის გადაცემა:

"ეს არის კოლექტივის ხელში გადაცემა იმ უფლების, რომ ის იყოს ძირითადი აქტორი არხის ბედის წარმართვაში. მე ვფიქრობ, ლევანმა და გიამ ნამდვილად უპრეცენენტო გადაწყვეტილება მიიღეს, თან უსასყიდლოდ".