ცენტრალური საარჩევნო კომისიის ყოფილი თავმჯდომარე, თამარ ჟვანია უზბეკეთში ამერიკული არასამთავრობო ორგანიზაციის, საარჩევნო სისტემების საერთაშორისო ფონდის (IFES) დირექტორად დაინიშნა. ამის შესახებ ინფორმაცია ორგანიზაციის ოფიციალურ ვებგვერდზეა განთავსებული.

"საარჩევნო სისტემების საერთაშორისო ფონდი მსოფლიოს ყველა რეგიონიდან არჩევნების მართვის უშუალო გამოცდილების მქონე, სფეროში პროფესიონალებს აგროვებს", — წერია ვებგვერდზე.

გარდა ამისა, ორგანიზაციის საიტზე უკვე გამოქვეყნებულია თამარ ჟვანიას ბიოგრაფია და ინფორმაცია მისი სამუშაო გამოცდილების შესახებ.

თამარ ჟვანიამ საქართველოს საარჩევნო კომისიის თავმჯდომარის პოსტი 30 ივნისს დატოვა. ის აცხადებდა, რომ პოლიტიკაში წასვლას არ აპირებს და საქმიანობას საერთაშორისო ორგანიზაციაში გააგრძელებს. 2020 წლის ოქტომბრის არჩევნების შემდეგ ოპოზიცია ჟვანიას არჩევნების გაყალბების ხელშეწყობაში ადანაშაულებდა და მის გადადგომას მოითხოვდა. ამ მოსაზრებას არ იზიარებდნენ ქართულ ოცნებაში.