ალერგოლოგ-იმუნოლოგი ბიძინა კულუმბეგოვის განცხადებით, სინოფარმითა და სინოვაკით აცრილებს ჯერ ბუსტერი არ სჭირდებათ. ის განმარტავს, რომ ამ ვაქცინების ფაიზერით ჩანაცვლების ერთადერთი მიზეზი მოგზაურობაა და მოუწოდებს მოქალაქეებს, უსაფუძვლოდ არ მიიღონ დამატებითი დოზა.

"სინოფარმი/სინოვაკით აცრილებო, სამედიცინო ჩვენებით ჯერ ბუსტერი არ გჭირდებათ, ვაქცინის ფაიზერით ჩანაცვლების ერთადერთი მიზეზია მხოლოდ მოგზაურობა. დაინდეთ თქვენი ორგანიზმი და უსაფუძვლოდ ნუ შეეცდებით დამატებითი დოზების მიღებას!!!" — წერს ის ფეისბქუგვერდზე.

კულუმბეგოვის განცხადებით, როგორც კი მწარმოებელი კომპანია და ჯანმრთელობის მსოფლიო ორგანიზაცია ამ ვაქცინებზე ბუსტერის საჭიროებას დაამტკიცებს, საქართველოშიც ავტომატურად მოხდება მისი გამოყენება.

"ახლა მთავარია ნებისმიერი ვაქცინის ორი დოზით ავცრათ დამატებით 1-1,5 მილიონი ჩვენი მოქალაქე", — ამბობს ის.

საქართველოს მოქალაქეების ნაწილს Covid-19-ის ვაქცინაციის ბუსტერისა და ჩანაცვლების მიღება უკვე შეუძლია. ჯანდაცვის მინისტრის შესაბამისი ბრძანება 11 ოქტომბერს გამოქვეყნდა. ბუსტერი ჰქვია აცრის მესამე დოზას, რომელმაც დამატებითი დაცვა უნდა უზრუნველყოს. ამ ეტაპზე, ბუსტერის ყველასთვის არ არის ნებადართული. სახელმწიფოს პოზიციაა, რომ მოსახლეობის უმრავლესობა ჯერ სრულად უნდა აიცრას პირველი და მეორე დოზით, ხოლო მესამე დოზა მიიღონ მაღალი რისკის ქვეშ მყოფმა პირებმა. ასევე, გამონაკლისია იმ ქვეყნებში გამგზავრება, რომლებსაც აღიარებული არ აქვთ სინოფარმი და სინოვაკი და იმისთვის, რომ საზღვარზე შეგიშვან, სხვა ვაქცინას ითხოვენ. თუმცა ეს უკვე აღარ არის ბუსტერ დოზა, ეს არის ე.წ. ჩანაცვლება და მათ შორის რამდენიმე სხვაობაა.