მოძრაობა მიშას თავისუფლებისთვის ბიძინა ივანიშვილის ბიზნესცენტრთან ექსპრეზიდენტის გათავისუფლების მოთხოვნით აქციას მართავს. როგორც აქტივისტი, გიორგი მუმლაძე ამბობს, სააკაშვილის გათავისუფლება დღეების საკითხია, რადგან ის შიმშილობს.

"მიხეილ სააკაშვილი, რომელიც არის პოლიტპატიმარი და ეს არის პირდაპირ კრემლის პირადი პატიმარი და პუტინის დავალება შეასრულა ბიძინა ივანიშვილმა. ეს არ არის მართლმსაჯულება, ეს არის რუსი ოლიგარქის შურისძიება სახელმწიფოს მართლა რეფორმატორზე და ჩვენი მთავარი მოთხოვნაა, რომ ეს ადამიანი უნდა გათავისუფლდეს ძალიან მალე. აქ არის დღეების საკითხი, რადგან შიმშილობს და არ დავუშვებთ იმას, რომ ჩვენმა მესამე პრეზიდენტმა იგივე ბედი გაიზიაროს, რაც გაიზიარა პირველმა პრეზიდენტმა, რომელიც ვერ დავიცავით. ჩვენ ამას ეროვნული და პირადი ღირსების საკითხია, რომ დავიცვათ მესამე პრეზიდენტი", — აცხადებს ის მთავარი არხის ეთერში.

აქტივისტების თქმით, აქციები იქნება პერმანენტული და მათი მიზანია ექსპრეზიდენტი არჩევნების მეორე ტურამდე გათავისუფლდეს.

მიხეილ სააკაშვილი პირველ ოქტომბერს დააკავეს. მან იმავე დღეს შიმშილობა გამოაცხადა. 10 ოქტომბერს, მისმა პირადმა ექიმმა, ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.

გაიგე მეტი: