გიორგი მამალაძის ადვოკატის, მია ზოიძის თქმით, დეკანოზს დანაშაულის აღიარების სანაცვლოდ შეწყალებას სთავაზობენ, თუმცა მამალაძე ამაზე უარს აცხადებს.

"ის, რაც სასამართლომ და პროკურატურამ ვერ შეძლო, ახლა უკვე მიდის ულტიმატუმებით საუბრები, მის თავისუფლებას და ჯანმრთელობასთან, გაუცვალონ დანაშაულის აღიარებაში. მან მითხრა, რომ მასთან იყო ამაზე მოლაპარაკებები, ვიღაცები შევიდნენ და უთხრეს, რომ თუ შენ აღიარებ, მაშინ შეგიწყალებთ, თუმცა რა თქმა უნდა, ბუნებრივია, მან უარი განაცხადა იმიტომ, რომ მიუხედავად იმისა, რომ ის ძალიან მძიმედ არის, ის არ ცვლის თავის ღირსებას თავისუფლებაში", — აცხადებს ადვოკატი.

გიორგი მამალაძე 2017 წლის 10 თებერვალს თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. შორენა თეთრუაშვილი, ილია მეორესთან ერთად, აღნიშნულ პერიოდში ბერლინში იყო, სადაც პატრიარქი მკურნალობდა.

დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა. 13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.