მარგვეთისა და უბისის მიტროპოლიტი მელქისედეკ ხაჩიძე ექსპრეზიდენტ მიხეილ სააკაშვილის მოსანახულებლად რუსთავის პენიტენციურ დაწესებულებაში მივიდა. სასულიერო პირის განცხადებით, მან რამდენიმე დღის წინ სააკაშვილის გათავისუფლების პეტიციასაც მოაწერა ხელი.

"დღეს მოვედი, რომ ვინახულო საქართველოს მესამე პრეზიდენტი, ვნახო მისი მდგომარეობა, გავესაუბრო, იმიტომ რომ ძალიან დიდი ინტერესია მისი ჯანმრთელობის მიმართ და იმედია ყველაფერი კარგად იქნება.

მე მის განთავისუფლებას მოვაწერე ხელი და გავაჟღერე იდეა, რომ აუცილებელია ჩვენი ერის საყოველთაო შერიგება, ერთმანეთის დაპირისპირება კარგს არაფერს მოგვიტანს და მიმაჩნია, რომ ჩვენ სასულიერო პირებმა, ეკლესიამ შუამავლის როლი შეასრულოს და როგორმე გააერთიანოს ჩვენი ერი", — განაცხადა მიტროპოლიტმა მელქისედეკმა ჟურნალისტებთან.

მიხეილ სააკაშვილი 15 დღეა შიმშილობს. 10 ოქტომბერს, მისმა პირადმა, ექიმმა ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. როგორც ექიმი განმარტავს, ეს შიმშილობის გამო მოხდა და მას უჭირს საუბარი და მოძრაობა. პასუხად პენიტენციური სამსახური ამტკიცებს, რომ ეს ინფორმაცია სიმართლეს არ შეესაბამება. მათი თქმით, როგორც მოშიმშილე, სააკაშვილი მუდმივად იმყოფება სამედიცინო პერსონალის დაკვირვების ქვეშ და მდგომარეობა დამაკმაყოფილებელია.

მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.

გარდა ამისა, 8 ოქტომბერს პენიტენციულმა სამსახურმა გაავრცელა ინფორმაცია, რომ სააკაშვილმა ციხის მაღაზიაში 7 ქილა თაფლი შეიძინა და დაწყებული აქვს საკვების მიღება. ამას უპასუხა სააკაშვილის ექიმმა და თქვა, რომ თაფლს მხოლოდ ერთ კოვზს იღებდა და ჩაიში აგდებდა. მისივე თქმით, ამ ინფორმაციაზე სპეკულაციების შემდეგ სააკაშვილმა თაფლის მიღებაც შეწყვიტა.

ამავე თემაზე: