პარტია ევროპული საქართველოს რუსთავის ორგანიზაციის თავმჯდომარე ვახტანგ ქებაძეს თავს დაესხნენ. ქებაძის თქმით, შემთხვევა გუშინ, 14 ოქტომბერს მოხდა, სანამ თბილისში გასამართ აქციას შეუერთდებოდნენ.

"გუშინ მოვემგზავრებოდი თბილისისკენ, გაჩერებულები ვიყავით რუსთავის გამოსასვლელთან, რამდენიმე თანმხლებ პირთან ერთად, გზის მეორე მხრიდან დაიძრნენ 50-70-მდე ადამიანი, რომელმაც მოგვაყენეს ფიზიკური და სიტყვიერი შეურაცხყოფა, მანქანას დაუშინეს კვერცხები და ცოცხები, ჩვენ ამოვიცანით მათი ვინაობა, ესენი იყვნენ ქართული ოცნების აქტივისტები", — განაცხადა ქებაძემ.

პარტიის პოლიტსაბჭოს თავმჯდომარის, გიგი წერეთელის განცხადებით, იყო ფიზიკური და სიტყვიერი შეურაცხყოფაც.

"ახლა ჩვენ ვიმყოფებით შუაგულ კამპანიაში, მეორე ტურები წინაა, ხელისუფლების მხრიდან ძალადობრივი ჯგუფების დაორგანიზება არის საგანგაშო, მოვუწოდებ სამართალდამცავ უწყებებს მოახდინონ რეაგირება ამ საგანგაშო ძალადობრივ ფაქტზე, სხვა შემთხვევაში ეს ნეგატიური ფონი გაგრძელდება", — განაცხადა წერეთელმა.

შინაგან საქმეთა სამინისტროში On.ge-ს განუცხადეს, რომ მომხდარზე გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.