ევროპული საქართველოს ლიდერის, გიგა ბოკერიას განცხადებით, პარტია თვითმმართველობის არჩევნების მე-2 ტურში ყველა ოპოზიციურ კანდიდატს დაუჭერს მხარს. კითხვაზე, მოიაზრება თუ არა მათ შორის ექსპრემიერის, გიორგი გახარიას პარტია, ბოკერია ამბობს, რომ ცუდსა და უარესს შორის არჩევანს ცუდის სასარგებლოდ გააკეთებს.

"ეს ერთი შემთხვევაა, რომელიც ვერ ქმნის ფონს, საბედნიეროდ, თუმცა თუ არჩევანი გაქვს ორ ცუდს შორის, უფრო ნაკლებად ცუდი უნდა აირჩიო, სამწუხაროდ, ეგეთი შემთხვევაა, თქვენ ცაგერს გულისხმობთ, ალბათ, მაგრამ ჯამში ეგ დილემა არ გვიდგას", — აცხადებს ბოკერია.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება, მათ შორის ცაგერშიც, სადაც გახარიას პარტიის მერობის კანდიდატი, ბესარიონ ბენდელიანი მიიღებს მონაწილეობას. მეორე ტური ჩატარდება თბილისშიც.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.