ევროპული საქართველოს ლიდერის, გიგა ბოკერიას განცხადებით, პარტია აპირებს, რომ თვითმმართველობის არჩევნების მე-2 ტურში დამკვირვებლად პოლიტიკური ფიგურები წარადგინოს. ბოკერია თქმით, თუ იგივეს სხვა პარტიებიც გააკეთებენ, ეს არჩევნების მიმდინარეობისას წარმოქმნილ რისკებს შეამცირებს.

"ჩვენ ვაპირებთ დამკვირვებლად მივავლინოთ პოლიტიკური ფიგურები, ვინც სიაში იყო, ვინც მე-2 ტურში აღარ არის და ვისაც უფლება აქვს დაკვირვების, რომ გავურთულოთ ამოცანა კომისიის რიგით წევრებს ჩვეულებრივ მოქალაქეებზე ზეწოლის, მათი კომპეტენციის პრობლემის, ზოგ შემთხვევაში საკუთარ პარტიაზე ვლაპარაკობ. იგივე უნდა გააკეთონ, ჩემი აზრით, სხვა პარტიების წარმომადგენლებმა, სადაც კომისიებში დაკვირვებლად პოლიტიკური ფიგურების მივლენა იქნება ფაქტორი, რომელიც რისკებს შეამცირებს", — განაცხადა ბოკერიამ.

მისივე თქმით, ეს არჩევნები არ არის რომელიმე პარტიის ან კანდიდატის მხარდაჭერაზე და შედეგებზე იქნება საყრდენი, როგორც ვადამდელი არჩევნების მიღწევისთვის კამპანიის, ასევე, პოლიტიკური დევნის შეჩერებისა და პოლიტიკური პატიმრების, მათ შორის მიხეილ სააკაშვილის გათავისუფლების კამპანიის ქვეყნის შიგნით და გარეთ.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება. მეორე ტური ჩატარდება თბილისშიც.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.