CRRC-ის კვლევის მიხედვით, გამოკითხული მოსახლეობის 82% ეთანხმება წინადადებას, რომ უმჯობესია სახელმწიფომ დაადგინოს რა, სად და როგორ უნდა აშენდეს და არა თავად სამშენებლო ინდუსტრიამ (ბიზნესმა). მხოლოდ 10% ეთანხმება მოსაზრებას, რომ უმჯობესია სახელმწიფო არ ჩაერიოს თუ რას, სად და როგორ ააშენებს სამშენებლო ბიზნესი. 3% არ ეთანხმება არცერთს, ხოლო 4%-მა არ იცის.

მკვლევარები რეგრესიული ანალიზის შედეგად აღნიშნავენ, რომ დაუსაქმებლები, ყველაზე ახალგაზრდა (18-34) და ყველაზე ხანდაზმული (55+) ასაკობრივი ჯგუფები, მმართველი პარტიის მხარდამჭერები და მიუმხრობელი ამომრჩევლები უფრო მეტად უჭერენ სახელმწიფო რეგულაციებს მხარს.

ამასთან, კვლევაში საუბარია რეკრეაციულ სივრცეებზე, კერძოდ — თბილისში არის რამდენიმე ტერიტორია, რომელიც ადრე რეკრეაციული სივრცე იყო, თუმცა დღეს კერძო მფლობელის ხელშია და მფლობელი სამშენებლო სამუშაოებს გეგმავს — აღნიშნულზე გამოკითხულთა 74% ფიქრობს, რომ თბილისის მერიამ უნდა გამოისყიდოს ეს სივრცეები, 15%-ის აზრით, არა.

ფოტო: CRRC

CRRC საქართველომ კვლევა 10 აგვისტოდან 5 სექტემბრამდე ჩაატარა. ორგანიზაციის ცნობით, მონაცემთა შეგროვების მეთოდი თბილისის მოსახლეობის წარმომადგენლობითი გამოკითხვა იყო. 2 951 რესპონდენტი გამოიკითხა ე.წ. შემთხვევითი ნომრების გენერირების პრინციპით (Random Digit Dial). ინტერვიუები ჩატარდა ქართულ ენაზე, გამოპასუხება იყო 14,1%, ცდომილების ზღვარია 1,8%.