ბათუმში ნანგრევებში მოყოლილი მანქანიდან გამოყვანილი ბავშვი კლინიკიდან გაწერეს. ინფორმაცია On.ge-ს იაშვილის კლინიკაში დაუდასტურეს. მთავარი ექიმის, თამარ ბახტაძის განცხადებით, ბავშვს აქვს წვივის ძვლის მოტეხილობა და ტანზე ზედაპირული დაზიანებები.

ბათუმში, 26 მაისის ქუჩაზე კორპუსი ჩამოინგრა. მსხვერპლის შესახებ ჯერჯერობით ინფორმაცია არ ვრცელდება. ამ ეტაპზე უცნობია ნგრევის მიზეზიც.

ჯერჯერობით, რაც დადასტურებულად ცნობილია, ნანგრევებში მოყოლილი მანქანიდან ერთი ბავშვი გამოიყვანეს. თავდაპირველად გავრცელდა ინფორმაცია ორი ბავშვის შესახებ, იგივე თქვა აჭარის ჯანდაცვის მინისტრმა ნინო ნიჟარაძემაც. თუმცა მოგვიანებით სამინისტრომ დააზუსტა, რომ ადგილზე იმყოფებოდა დედა და კიდევ ერთი ბავშვი, რომლებიც არ დაშავებულან, თუმცა სასწრაფო დახმარების ბრიგადამ კლინიკაში ორივე ბავშვი გადაიყვანა, რის გამოც გავრცელდა ინფორმაცია ორი ბავშვის დაშავების შესახებ.

გარდა ამისა, ცნობილია, რომ ნანგრევებში არის მინიმუმ ერთი ადამიანი, რომელიც კონტაქტურია.

შინაგან საქმეთა სამინისტროს ინფორმაციით, საცხოვრებელი კორპუსის ჩამონგრევაზე გამოძიება დაწყებულია.