საქართველოს საკონსტიტუციო სასამართლომ დღეს, 17 საათზე კანაფის მცირე, დიდი ან განსაკუთრებით დიდი ოდენობით უკანანოდ დათესვის, მოყვანის ან კულტივირებისთვის სასჯელის არაკონსტიტუციურად ცნობის საკითხზე მსჯელობა განაახლა. სარჩელით სასამართლოს მოქალაქეებმა ჯამბულ გვიანიძემ, დავით ხომერიკმა და ლაშა გაგიშვილმა მიმართეს.

მოქალაქეები მიიჩნევენ, რომ მოცემული ქმედებებისათვის დაწესებული სანქცია - თავისუფლების აღკვეთა - არაადამიანური და დამამცირებელი სასჯელია. გარდა ამისა, მათი განმარტებით, კანაფის ოდენობის განსაზღვრისას ითვლება მცენარის ისეთი ნაწილებიც, რომლებიც არ არის ვარგისი ნარკოტიკული საშუალების დასამზადებლად.

"არ ხდება მცენარეში შემავალი ნარკოტიკული ნივთირების - ტეტრაჰიდროკანაბინოლის ოდენობის განსაზღვრა, რის გამოც, შესაძლოა პირი დაისაჯოს ნარკოტიკული თრობისთვის სრულიად უვარგისი მცენარის მოყვანის შემთხვევაშიც კი," - მიიჩნევენ საჩივრის ავტორები.

სარჩელის დაკმაყოფილების შემთხვევაში საქართველოს სისხლის სამართლის კოდექსის 265-ე მუხლის ის ნორმები გახდება არაკონსტიტუციური, რომლითაც ნარკოტიკული საშუალების შემცველი მცენარის - კანაფის მცირე, დიდი ან განსაკუთრებით დიდი ოდენობით უკანონოდ დათესვისთვის, მოყვანისთვის ან კულტივირებისთვის სასჯელის სახედ თავისუფლების აღკვეთაა გათვალისიწინებული.