საქართველოს პრეზიდენტის ადმინისტრაციის ცნობით, პრეზიდენტმა მარგველაშვილმა "საკონსტიტუციო სასამართლოს შესახებ" კანონში შეტანილ ცვლილებებთან დაკავშირებით კონსულტაცია გამართა საკონსტიტუციო სასამართლოს თავმჯდომარესთან, გიორგი პაპუაშვილთან.

პრესსამსახურის ინფორმაციით, როგორც გიორგი მარგველაშვილმა შეხვედრისას აღნიშნა, პარლამენტის მიერ კანონის მიღების პროცესი ბევრ კითხვას ბადებს, რადგან პროცესი წარიმართა როგორც საკონსტიტუციო სასამართლოს, ასევე ვენეციის კომისიასთან კონსულტაციის გარეშე.

პრეზიდენტმა გიორგი პაპუაშვილს გააცნო ის ნაბიჯები, რაც გადადგა კანონის უკეთ შესასწავლად და მისი მოსაზრებითაც დაინტერესდა.

"როგორც საკონსტიტუციო სასამართლოს თავმჯდომარემ აღნიშნა, კარგი იქნებოდა, რომ კანონის მიღებამდე კონსულტაციები პარლამენტის მხრიდან გამართულიყო.

გიორგი პაპუაშვილმა საქართველოს პრეზიდენტს მადლობა გადაუხადა ინიციატივის გამოჩენისთვის და იმედი გამოთქვა, რომ პოლიტიკური ძალები და ინსტიტუტები გულისყურით მოეკიდებიან "საკონსტიტუციო სასამართლოს შესახებ" კანონს", - ნათქვამია პრეზიდენტის ადმინისტრაციის მიერ გავრცელებულ განცხადებაში.