ქართული ოცნების პოლიტსაბჭოს წევრის, სოზარ სუბარის თქმით, სიმბოლურია, რომ 2 ოქტომბრის არჩევნებამდე ცოტა ხნით ადრე ქართულ ციხეში აღმოჩნდნენ ყოფილი პრეზიდენტი, მიხეილ სააკაშვილი და სამხედრო პოლიციის ყოფილი ხელმძღვანელი, მეგის ქარდავა.

სუბარმა ყურადღება გაამახვილა იმაზე, რომ აქამდე ქართული ოცნების მხარდამჭერთა "პრეტენზია" მათ მიმართ იყო ის, რომ "არ მოხერხდა სამართლიანობის სრულად აღდგენა ამ 9 წლის განმავლობაში".

"სიმბოლური იყო, რომ ზუსტად ამ არჩევნების წინ, ერთმანეთისგან ორი კვირის დაშორებით, ორი მთავარი დამნაშავე, ორი სიმბოლო უსამართლობისა და წამების აღმოჩნდა ქართულ ციხეში — მეგის ქარდავა, რომელიც იყო მთავარი მწამებელი და მართლა წამების სიმბოლო იყო ამ ქვეყანაში და მიხეილ სააკაშვილი, რომელიც იყო ამ დანაშაულებრივი სისტემის შემქმნელი", — განაცხადა სოზარ სუბარმა პარლამენტში.

მისი თქმით, სააკაშვილი და ქარდავა ციხეში ნახავენ, რა განსხვავებაა მათ მიერ შექმნილ და ახლანდელ პენიტენციურ სისტემას შორის.

"დღეს აი ეს ორი ადამიანი, მეგის ქარდავა და მიხეილ სააკაშვილი, თავისი თვალით ნახავენ, რა განსხვავებაა მათ მიერ შექმნილ სისტემასა და იმ სისტემას შორის, სადაც არ აწამებენ ადამიანებს, სადაც მკურნალობენ თითოეულ ადამიანს, ვისაც სჭირდება მკურნალობა და სადაც, უბრალოდ, ადამიანურად ექცევიან ყველა პატიმარს", — განაცხადა სოზარ სუბარმა.

27 სექტემბერს ექსპრეზიდენტმა სააკაშვილმა ფეისბუქზე გამოაქვეყნა ბილეთების ფოტო, რომლის მიხედვითაც ქვეყანაში 2 ოქტომბერს, ხმის მიცემის პროცედურის დასრულების შემდეგ უნდა დაბრუნებულიყო. მმართველ გუნდში ამბობდნენ, რომ ის სიტყვას ისევ უღალატებდა და ჩამოსვლას ვერ გაბედავდა, მაგრამ თუ მაინც გაბედავდა, აეროპორტშივე დააკავებდნენ. თუმცა, არჩევნების წინა დღეს, პირველ ოქტომბერს, სააკაშვილმა დაპოსტა, რომ საქართველოში იმყოფებოდა. რამდენიმე საათში მან ორი ვიდეოც გაავრცელა, რომელშიც ამბობდა, რომ ბათუმშია და აქტიურად აპირებს ბრძოლას.

სანამ სააკაშვილი მხარდამჭერებს მობილიზაციისკენ მოუწოდებდა, ქართულ ოცნებაში ამტკიცებდნენ, რომ ის არათუ ქვეყანაში შემოვიდა, უკრაინაში იყო. იმავეს ამბობდა შინაგან საქმეთა სამინისტროც და ამტკიცებდა, რომ მას არც უკრაინის და არც საქართველოს საზღვრები არ გადაუკვეთავს. ამ განცხადებებიდან რამდენიმე საათში პრემიერმინისტრმა, ირაკლი ღარიბაშვილმა შინაგან საქმეთა მინისტრთან და სახელმწიფო უსაფრთხოების სამსახურის ხელმძღვანელთან ერთად ბრიფინგი გამართა, სადაც თქვა, რომ სააკაშვილი დაკავებულია და პენიტენციურ დაწესებულებაში გადაიყვანეს. მოგვიანებით, იმედის ეთერში პრემიერმინისტრი ამტკიცებდა, რომ ყველაფერი წინასწარ იცოდნენ და "ოპერატიული ტაქტიკის" გამო უწევდათ საპირისპირო განცხადებების გაკეთება.

რაც შეეხება მეგის ქარდავას, იგი უკრაინიდან საქართელოში 17 სეტემბერს ჩამოიყანეს. ქარდავა აეროპორტიდან რუსთავის პენიტენციურ დაწესებულებაში გადაიყვანეს. საქართველოს ხელისუფლება მეგის ქარდავას ექსტრადირებნას რამდენიმე წელია ითხოვდა. მან საქართველო 2012 წელს, ხელისუფლების ცვლილების შემდეგ დატოვა.