ადა მარშანიას განცხადებით, პარლამენტის ყველა სხდომა ოკუპირებულ ტერიტორიებზე საუბრით უნდა იწყებოდეს. ამის შესახებ ფრაქცია პატრიოტთა ალიანსის წარმომადგენელმა პლენარულ სხდომაზე განაცხადა.

მარშანიას თქმით, სოხუმსა და ცხინვალში მიმდინარეობს პროცესები, რომელთა გამოც რეგიონები ნელ-ნელა შორდებიან საქართველოს ხდებიან რუსეთის ნაწილი. ადა მარშანიას თქმით, 15 წელია მიიღება რეზოლუციები და მათ არანარი შედეგი არ აქვთ. მარშანიამ დეპუტატებს კითხვები დაუსვა:

"აბსოლუტურად სერიოზულად გეკითხებით: გავიაზრეთ და გავითავისეთ ჩვენ, თუ არა, რომ არც აფხაზებს, არც ოსებს არ სურთ და აღარასოდეს დათანხმდებიან, რომ იყვნენ საქართველოს ავტონომიები? გვესმის ეს ჩვენ თუ არა? ვაპირებთ თუ არა ამაზე ფიქრს და მსჯელობას? ვაცნობიერებთ, თუ არა იმას, რომ აფხაზებს და ოსებს ჩვენთან არც ფედერაციული ურთიერთობა უნდათ და არც კონფედერაციული? ვაცნობიერებთ თუ არა და ვფიქრობთ თუ არა, ამ კუთხით რა ვქნათ? ვაცნობიერებთ, თუ არა რომ ომი შეუძლებელია და ომით ვერ დავიბრუნებთ სოხუმს და ცხინვალს? ე.ი. სხვა გზები უნდა მოვძებნოთ და რატომ არ ვმსჯელობთ არასოდეს ამ გზებზე?"