პარლამენტის თავმჯდომარის მოადგილის, არჩილ თალაკვაძის აზრით, სენატორ რიშის განცხადება ნიშნავს იმას, რომ იგი არა ზოგადად არჩევნებით, არამედ, არჩევნებზე ოპოზიციის მიერ მიღებული შედეგებითაა უკმაყოფილო.

"მე უფრო ასე გავიგე ეს განცხადება, რომ ბატონი რიში იმედგაცრუებულია ოპოზიციის მიერ მიღებული შედეგებით, ვინაიდან, ამ არჩევნებში მართლაც, როგორც საარჩევნო კანონდმებლობის თვალსაზრისით, იგივე საარჩევნო გარემოს გათვალისწინებით, ოპოზიციას ნამდვილად ჰქონდა შესაძლებლობა, რომ კონკურენტულ რეჟიმში მიეღო მეტი მხარდაჭერა", — ამბობს თალაკვაძე.

სენატორმა ჯიმ რიშმა გუშინ, 4 ოქტომბერს გამოაქვეყნა განცხადება, სადაც ამბობს, რომ საქართველოში ჩატარებული არჩევნები დაუჯერებლად იმედგამაცრუებელი იყო. მისი თქმით, ეს იყო დრამატული უკუსვლა 2012 წლის არჩევნებისგან, რომელსაც ის აკვირდებოდა.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება. მეორე ტური ჩატარდება თბილისშიც.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.