პრემიერმინისტრი, ირაკლი ღარიბაშვილი მიხეილ სააკაშვილის განცხადებაზე იმასთან დაკავშირებით, რომ ის მეგის ქარდავას არ შეხვედრია ამბობს, რომ შეუძლია საჯაროდ შესთავაზოს გაცნობა.

"სააკაშვილი გამოვიდა, მეგის ქარდავას არ ვიცნობო. მე შემიძლია საჯაროდ შევთავაზო გაცნობა. სხვათა შორის, გვერდიგვერდ სხედან", — განაცხადა იმედის ეთერში ირაკლი ღარიბაშვილმა.

მისივე თქმით, მისი მინისტრობის დროს გახმაურებული საქმეები გამოიძიეს, რაც სამეგრელოში ხდებოდა და უკვირს, თუ რატომ დაუჭირეს ზუგდიდში მხარი ნაციონალური მოძრაობის კანდიდატს.

"მეგის ქარდავა რომ ჩამოვიყვანეთ, მოგეხსენებათ, რომ მაშინ მინისტრი ვიყავი, გამოვიძიეთ ძალიან გახმაურებული საქმეები, მათ შორის, კასრების საქმეები და ეს ყველაფერი ხდებოდა სამეგრელოში. ახლა, რა თქმა უნდა, მიკვირს ახლა, ბუნებრივია, ზუგდიდმა რატომ მისცა ხმა, რატომ დაუჭირა მხარი, ამხელა პროცენტი რატომ აიღეს. ეს ცალკე უბედურებაა ახლა, რა თქმა უნდა. თუ რამე უბედურება ხდებოდა, ტანჯვა, ადამიანების წამება, გაუპატიურება და რაღაცები, იმ მხარეში ხდებოდა ამ სადისტების მეშვეობით ", — აცხადებს ის

საქართველოს ექს-პრეზიდენტმა, მიხეილ სააკაშვილის თქმით, მეგის ქარდავას პირადად არასდროს შეხვედრია და მისი არსებობის შესახებ მხოლოდ პრესიდან იცის.

ქარდავას უკრაინაში დაკავების შესახებ ინფორმაცია 2017 წელს გავრცელდა. იქამდე, ის ინტერპოლით წითელი ცირკულარით იძებნებოდა. სამხედრო პოლიციის ყოფილი ხელმძღვანელის მიმართ საქართველოში არსებული 11 სისხლის სამართლის საქმიდან ხუთზე გამამტყუნებელი განაჩენია გამოტანილი, ხოლოდ 6 სისხლის სამართლის საქმე თბილისის საქალაქო სასამართლოში იხილება.

სააპელაციომ საქალაქო სასამართლოს გადაწყვეტილება, რომელმაც სერგო თეთრაძის წამების საქმეზე ქარდავა გაამართლა, შეცვალა და ყოფილ მაღალჩინოსანს პატიმრობა მიუსაჯა. მას დაუსწრებლად ცხრა წლით თავისუფლების აღკვეთა აქვს შეფარდებული. სასამართლოს გადაწყვეტილებით, ის დამნაშავედ სცნეს 144-ე და 138-ე მუხლებით, რაც სექსუალური ხასიათის ძალმომრეობასა და წამებას გულისხმობს.

მეგის ქარდავა საქართველოში 17 სექტემბერს ჩამოიყვანეს.