კახაბერ ქემოკლიძის აზრით, პარტია საქართველოსთვის არჩევნების მე–2 ტურში არც ქართულ ოცნებასა და არც ნაციონალურ მოძრაობას მხარს არ დაუჭერს. თუმცა, ის განმარტავს, რომ ეს მისი მოსაზრებაა და პარტიის მხრიდან ამ გადაწყვეტილების გაჟღერებას სჭირდება პოლიტიკური ველის გაანალიზება.

"მე ვერ დაგიდასტურებთ, რომ რამე ტიპის მოწოდება იქნება, სუბიექტურად, კახაბერ ქემოკლიძე, ვადასტურებ ამას. ჩვენ გვჭირდება კარგად გაანალიზება პოლიტიკური ველის, მაგრამ, მე ვფიქრობ, რომ პარტია საქართველოსთვის და ჩვენი გუნდის მხარდამჭერები არიან ძალიან კარგად გათვიცნობიერებული არსებულ პოლიტიკურ მცემულობაში და მათ რამე ტიპის მოწოდება — ერთს მიემხრონ, ან მეორეს — არ დასჭირდება. გული ამას მიგრძნობს, რაღა დაგიმალოთ", — ამბობს ქემოკლიძე ფორმულას ეთერში.

კითხვაზე, თუ რას უპასუხებს ქემოკლიძე ენმ–ის წევრის, თინა ბოკუჩავას განცხადებას, რომ გახარიას პარტიის ოპოზიციონერობა გამოჩნდება იმით, თუ ვის დაუჭერენ მხარს არჩევნების მეორე ტურში, ქემოკლიძე ამბობს, რომ ეს "უკვე ემპირიულად, მათემატიკურად და ქმედებით დადასტურდა".

გარდა ამისა, მან TV პირველის ეთერში განაცხადა, რომ პასუხი კითხვაზე, ვის დაუჭერენ მხარს, მარტივი და ლოგიკურია — "არც ერთს და არც მეორეს".

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.