ნაციონალური მოძრაობის ერთ-ერთი ლიდერის, ხატია დეკანოიძის განცხადებით, ქართულ ოცნებას დაწყებული ზეიმი ჩაეშალა. მისივე თქმით, თბილისის მერი, კახი კალაძე სცენაზე გაღიმებული დატოვეს.

"გუშინ ქართულ ოცნებას ჩაეშალა დაწყებული ზეიმი. ჩაეშალა დაწყებული ზეიმი განსაკუთრებით დიდ ქალაქებში და ჩაეშალა მათი მთელი სტრუქტურა, როდესაც ამბობდნენ, რომ, აი, ჩვენ მეორე ტურები არ გვექნება, პირველ ტურში მოიგებს ყველა თვითმმართველ ქალაქში და თბილისში, განსაკუთრებით, თბილისში, ხაზს ვუსვამ, ქართული ოცნება და გაღიმებული კახი კალაძე, ასე ვთქვათ, სცენაზე დატოვეს", — განაცხადა ხატია დეკანოიძემ ბრიფინგზე.

მისი თქმით, საქართველოს დიდმა ქალაქებმა რეჟიმს ბრძოლა გამოუცხადა.

ცესკოს ინფორმაციით, თბილისში 769 უბნიდან ყველა დათვალეს. ამ დროის მონაცემებით, ქართულ ოცნებას 40,3% აქვს, ნაციონალურ მოძრაობას — 27,97%, გახარიას პარტიას კი 8,85%.

რაც შეეხება კანდიდატებს, ამ დროის მონაცემებით, თბილისში ხმების 96,23% არის დათვლილი და ქართული ოცნების კანდიდატს, კახა კალაძეს ხმათა 44,96% აქვს, ხოლო ნაციონალური მოძრაობის კანდიდატს, ნიკა მელიას — 33,94%.

თბილისის მერობის კანდიდატის, კახა კალაძის განცხადებით, გაუხარდებოდა, პირველივე ტურში რომ მოეგო და ამის მოლოდინი ჰქონდა კიდეც. კალაძემ აღნიშნა ისიც, რომ შეიძლება, რამე დააკლო საარჩევნო პროცესს და ბოდიშიც მოიხადა.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.