შვეიცარიაში ხელოვნების რიგით 23-ე საერთაშორისო გამოფენა იმართება. გამოფენა ევროპაში ერთ-ერთ ყველაზე პრესტიჟულ ღონისძიებად მიიჩნევა და მასში სხვადასხვა ქვეყნის წარმატებული ხელოვანები იღებენ მონაწილეობას. წელს მათ შორის შვეიცარიაში მოღვაწე ახალგაზრდა და ნიჭიერი ქართველი მხატვარი, მამუკა კაპანაძეც აღმოჩნდა.

მამუკა, რომელიც ამ ღონისძიებაში უკვე მეორედ მონაწილეობს, წელს ახალი კონცეფციითაა წარმოდგენილი — ტრანსცენდენტული. კონცეფციამ დამთვარიელებლის დიდი ინტერესი და მოწონებაც დაიმსახურა.

2 ოქტომბერს ღონიძიებას საქართველოს ელჩი შვეიცარიის კონფედერაციაში, რევაზ ლომინაძე და, მასთან ერთად, საელჩოს დელეგაცია ესტუმრა. საელჩოს წარმომადგენლებმა მამუკა კაპანაძის საგამოფენო სივრცე მოინახულეს და მისი ნამუშევრები დაათვალიერეს, რის შემდეგაც მას წარმატებები უსურვეს და სამომავლო მხარდაჭერასაც დაპირდნენ.

მამუკა კაპანაძე 1979 წელს დაიბადა. 2006 წელს თბილისის სახელმწიფო სამხატვრო აკადემიის დასრულების შემდეგ, მხატვარმა მონაწილეობა არაერთ სოლო თუ ჯგუფურ გამოფენაში მიიღო. იგი ასევე მონაწილეობდა რამდენიმე ქართული ეკლესიის ფრესკების შექმნაშიც.

"თავის პეიზაჟებსა და ნატურმორტებში მხატვარი იყენებს მკაფიო კონტურებსაც და ძლიერ მონასმებს, რათა ისეთ შეკრულ და მოწესრიგებულ ამბავს მოჰყვეს, რომელსაც დამთვალიერებელი ყოველ შეხედვაზე ხელახლა აღმოაჩენს", — ვკითხულობთ გამოფენის გვერდზე, — "ამჟამად იგი უმეტესად მუშაობს მიქსმედიისა და სხვა რამდენიმე აბსტრაქტულ სტილში, როგორიცაა აბსტრაქტული ექსპრესიონიზმი და ლირიკული აბსტრაქცია".

მამუკას ნამუშევრები საქართველოში და მის ფარგლებს გარეთ, ინახება სხვადასხვა კერძო და საჯარო კოლექციაში, მათ შორის, საქართველოს საელჩოშიც შვეიცარიაში.

ხელოვნების საერთაშორისო გამოფენა 3 ოქტომბერს, შვეიცარიის დროით 18:00-ზე დასრულდება.

უფრო მეტ დეტალს ღონისძიებისა და მონაწილის შესახებ მხატვრის ფეისბუქგვერდზე და გამოფენის ონლაინკატალოგიდან შეიტყობთ.