პარტია "საქართველოსთვის" წარმომადგენელმა ანა ბუჩუკურმა თვითმმართველობის არჩევნების ეგზიტპოლებთან დაკავშირებით ბრიფინგი გამართა და განაცხადა, რომ ჩატარებული ეგზიტპოლების შედეგები მათი პარტიისთვის ნაკლებად სანდოა.

"ჩვენი გუნდისთვის და ჩვენი პარტიისთვის ეგზიტპოლები ყველაზე ნაკლებ დამაჯერებელია. ჩვენი მხარდამჭერების მისამართით თვეების განმავლობაში არის უპრეცენდენტოდ სისტემური ზეწოლის და დაშინების ფაქტებია და შესაბამისად, ბუნებრივია, რომ ისინი თავიანთ გაკეთებულ არჩევანს არ დააფიქსირებენ და მეორეც, სხვადასხვა პოლიტიკურ პარტიებს სჩვევიათ ხოლმე საკუთარი პოლიტიკური ინტერსებისთვის ამ ეგზიტპოლების გამოყენება. ჩვენ დაველოდებით ოფიციალურ შედეგებს ცესკოს მხრიდან", — განაცხადა ანა ბუჩუკურმა.

შეგახსენებთ, რომ ცოტა ხნის წინ გამოქვეყნდა თვითმმართველობის არჩევნებისთვის მომზადებული სამი ეგზიტპოლის შედეგები, რომელთაგან იმედის დაკვეთით ჩატარებული ეგზიტპოლის მიხედვით, თბილისის მერობის კანდიდატმა გიორგი გახარიამ 5,6% დააგროვა; მთავარი არხის დაკვეთით ჩატარებული ეგზიტპოლი აჩვენებს, რომ თბილისში გახარიამ 8,7% მოიპოვა, ფორმულას ეგზიტპოლის შედეგებში კი 7%-ით მესამე ადგილს იკავებს პარტია საქართველოსთვის ლიდერი გიორგი გახარია კახა კალაძესა და ნიკა მელიას შემდეგ.