ლელოს წევრის, ლევან სამუშიას განცხადებით, გადასატანი ყუთის სიის 37 ამომრჩეველთან ჩაბარების ოქმი ბიულეტინების მიტანის გარეშე შეივსო. მან გამოძიების დაწყება მოითხოვა.

"ზუგდიდის მე-17 უბნის კომისიის მიერ გადასატანი ყუთების 37 ამომრჩეველის სახელზე გაგზავნილი იყო ბიულეტინები, საპასუხოდ სიაში მყოფი ყველა მოქალაქის ხელმოწერა იყო დაფიქსირებული ბიულეტინის ჩაბარების თაობაზე. ვითომ ხელისმომწერი ადამიანები საარჩევნო უბანზე გამოცხადდნენ და მოითხოვეს კონსტიტუციით გარანტირებული უფლების შესრულება. საარჩევნო უბანზე მათ განუცხადეს, რომ ბიულეტინების ჩაბარების ოქმზე ხელი ჰქონდათ მოწერილი, რასაც საპასუხო პროტესტი მოჰყვა და რამდენიმემ განცხადებაც დაწერა", — აღნიშნა სამუშიამ.

მისივე თქმით, სავარაუდოდ ამ ამომრჩეველთა ნაწილს ხმის მიცემის უფლება ხელმეორედაც მისცეს.

"საჩივარი ჩვენმა წარმომადგენელმაც დაწერა. ითქვა ისიც, რომ მათ ნაწილს ხელმეორედ მისცეს ხმის მიცემის უფლება. ჩვენ ვითხოვთ არამხოლოდ საარჩევნო უბნის შედეგების გაუქმებას, გაყალბებასთან დაკავშირებით გამოძიების დაწყებასაც".

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.