პარტია ლელოს თავმჯდომარე, მამუკა ხაზარაძე ამბობს, რომ საკუთარ თავს მომავალი კოალიციური მთავრობის ეპიცენტრში ხედავს. არჩევნებამდე ერთი დღით ადრე, მედიისთვის გამართულ პრესკონფერენციაზე, On.ge-ს კითხვას კოალიციური მთავრობის შესახებ ხაზარაძემ ასე უპასუხა:

"ჩვენ ვხედავთ კოალიციური მთავრობის ეპიცენტრში ჩვენს თავს. იმიტომ რომ გვაქვს ძალიან კონკრეტული გეგმა ამ ქვეყნის გარდაქმნის და გაგრძელების, დანარჩენი დეტალებია".

ვისთან ითანამშრომლებს ლელო, თუ კოალიციური მთავრობის შექმნა დადგება დღის წესრიგში? Netgazeti-ს კითხვას ხაზარაძემ უპასუხა, რომ მათთვის მთავარი პროდასავლური ხედვაა.

"ვისთან წარმოგვიდგენია კოალიცია, შემიძლია გითხრათ, რომ ეს არის პროდასავლური ორიენტაციის პარტიები, რომლებიც მიყვებიან ქართველი ერის არჩევანს, რომელიც მან გააკეთა 30 წლის წინ. 9 აპრილიდან დაწყებული, 30 წლის წინ ქართველმა ერმა აირჩია დასავლური ღირებულებები, ევროპის ოჯახში გაერთიანება და ა.შ. დღეს იმიტომ რომ ბევრი პარტიაა წარმოდგენილი, დღეს საუბარი იმაზე, კონკრეტულად რაზე გავერთიანდებით იქნება არასწორი, ეს ყოველთვის ხდება არჩევნების მეორე დღეს, ჩვენ დაახლოებითი მონახაზი გვაქვს, მაგრამ დაველოდოთ არჩევნებს, დაველოდოთ შედეგებს", — თქვა ხაზარაძემ.

თვითმმართველობის არჩევნები ხვალ, 2 ოქტომბერს გაიმართება. ოპოზიციის ნაწილი აცხადებს, რომ შარლ მიშელის შეთანხმების შესაბამისად, მას რეფერენდუმის სახე ექნება და თუ ქართული ოცნება 43%-ზე მეტს ვერ აიღებს ვადამდელი საპარლამენტო არჩევნები გაიმართება. თავად, მმართველი პარტიაში, რომელმაც მიშელის შეთანხმება ანულირებულად გამოაცხადა, ამბობენ, რომ ეს მხოლოდ თვითმმართველობის არჩევნებია და შემდეგი საპარლამენტო არჩევნები 2024 წელს გაიმართება.