ქართული ოცნების თავმჯდომარის, ირაკლი კობახიძის თქმით, როდესაც გიორგი გახარია საუბრობს იმაზე, რომ ბიძინა ივანიშვილმა მისი ნდობა არ გაამართლა, ეს აჩვენებს მისი ყოველი ნაბიჯის პარადოქსს.

"ბიძინა ივანიშვილმა შექმნა ის, როგორც პოლიტიკოსი იმიტომ, რომ მან მისცა ეს ნდობა, ის გახდა პრემიერმინისტრი სწორედ ბიძინა ივანიშვილის ნდობის საფუძველზე, როდესაც ივანიშვილი იყო პარტიის თავმჯდომარე და რა გააკეთა ამის შემდეგ, როგორც კი გავიდა ბიძინა ივანიშვილი პოლიტიკიდან, 1 თვეში პირდაპირ, პირველი რაც გააკეთა, უღალატა გუნდს და კიდევ უფრო მნიშვნელოვანი რაც არის, უღალატა ქვეყანას და ასეთ დროს საუბრობს ის იმაზე, რომ კონკრეტულად ბიძინა ივანიშვილმა მას ნდობა არ გაუმართლა, ეს აჩვენებს მთელ პარადოქსს მისი ყოველი ნაბიჯის", — განაცხადა მან რუსთავი 2-ის ეთერში.

მისივე თქმით, გახარია ბოლო დროის განმავლობაში აბსოლუტურად აჭრილია.

"აბსოლუტურად აჭრილია ბოლო დროის განმავლობაში. ამასწინათ კეზერაშვილის ტელევიზიაში იჯდა თუ იდგა და ასეთი რაღაც თქვა, რომ ბიძინა ივანიშვილმა ჩემი ნდობა დაკარგაო. ზუსტად ამ წრიდან არის ეს გამონათქვამიც, რაც უკავშირდება ოცნების და მიხეილ სააკაშვილის ერთმანეთთან ინტერესებით დაკავშირებას. ბიძინა ივანიშვილთან დაკავშირებით განცხადებაზეც გავაკეთებ მოკლე კომენტარს, ანუ კაცი წარმოიდგინეთ ამბობს, რომ ბიძინა ივანიშვილმა დაკარგა მისი ნდობა. ვინ შეიძლება დაკარგოს შენი ნდობა — ვინც შენ ფეხზე დააყენე და ა.შ. გიორგი გახარიამ დააყენა ფეხზე ბიძინა ივანიშვილი, როგორც პიროვნება, ასწავლა ქველმოქმედება, ასწავლა პოლიტიკა, როგორ ჩამოეშორებინა ეს რეჟიმი ძალაუფლებას, ა.შ. და ბოლოს არ გაუმართლა — აბსოლუტურად ღიმილისმომგვრელი ამბავია, პირიქით უნდა იყოს ეს ყველაფერი", — ამბობს კობახიძე.

ექსპრემიერმა, გიორგი გახარიამ განაცხადა, რომ ქართული ოცნების დამფუძნებელმა, ბიძინა ივანიშვილმა მისი ნდობა არ გაამართლა. ამის შესახებ მან მაშინ განაცხადა, როცა ჟურნალისტმა შეახსენა, რომ ადრე საუბრობდა ივანიშვილის "უმნიშვნელოვან როლზე" ქართული ოცნების მიმართ ნდობის საკითხში და ჰკითხა, ახლაც იმავე აზრზე იყო თუ არა. გახარიამ ამ კითხვას უარყოფითი პასუხი გასცა და თქვა: "ივანიშვილმა ნდობა არ გაამართლა. მარტო ჩემი არა, მოქალაქეების".