პრემიერმინისტრ ირაკლი ღარიბაშვილთან შეხვედრის დროს აზერბაიჯანის პრეზიდენტმა, ილჰამ ალიევმა განაცხადა, რომ "როგორც მეგობარ ქვეყანას, ძალიან ახარებთ საქართველოს მთავრობის წარმატებები ყველა სფეროში. ალიევის თქმით, აზერბაიჯანის რესპუბლიკისთვის იმედისმომცემია საქართველოს პოზიტიური საინვესტიციო გარემო და ეკონომიკური რეფორმები.

აზერბაიჯანის რესპუბლიკის პრეზიდენტმა აღნიშნა, რომ აზერბაიჯანსა და საქართველოს შორის თანამშრომლობის განსაკუთრებული ფორმა ჩამოყალიბდა, მიმდინარე პროექტები კი მნიშვნელოვანია არა მხოლოდ აზერბაიჯანისა და საქართველოსთვის, არამედ ევრაზიის რეგიონის ბევრი სხვა სახელმწიფოსთვისაც.

"როგორც მეგობარ ქვეყანას, ჩვენ ძალიან გვახარებს თქვენი მთავრობის წარმატებები ყველა სფეროში, გისურვებთ წარმატებას პირადად თქვენ და თქვენს მთავრობას", — თქვა ალიევმა.

ღარიბაშვილმა თქვა, რომ შეხვედრაზე საქართველოსა და აზერბაიჯანს შორის არსებული ურთიერთობები და რეგიონალური ტრანსფორმაციის მნიშვნელობა განიხილეს. მისივე თქმით, მან აღნიშნა, რომ საქართველო ორმხრივი პოლიტიკური, ეკონომიკური, კულტურული და სხვა ტიპის კავშირების განმტკიცებით დაინტერესებულია.

"ჩვენს ინტერსებში, ასევე, შედის მშვიდობა და სტაბილურობა რეგიონში, რაც მტკიცე ეკონომიკურ განვითარებას უზრუნველყოფს. ეს არის წელს ჩემი მეორე ვიზიტი და როგორც ბატონმა პრეზიდენტმა აღნიშნა, ჩვენ არაერთხელ გვქონდა დიალოგი ტელეფონით", — განაცხადა ირაკლი ღარიბაშვილმა.

ღარიბაშვილის ვიზიტი ბაქოში ილჰამ ალიევთან პირისპირ შეხვედრით დაიწყო, რომელიც ზაგულბას სასახლეში გაიმართა.

საქართველოს დელეგაციაში, რომელსაც პრემიერმინისტრი ხელმძღვანელობს, ვიცე-პრემიერი, საგარეო საქმეთა მინისტრი დავით ზალკალიანი, ეკონომიკისა და მდგრადი განვითარების მინისტრი ნათია თურნავა და მთავრობის ადმინისტრაციის უფროსი ილია დარჩიაშვილი იმყოფებიან.