კულტურის, სპორტისა და ახალგაზრდობის მინისტრმა თეა წულუკიანმა, ქართული სპორტის მუზეუმის დირექტორად ნინო სალუქვაძე წარადგინა. წულუკიანის თქმით, დაწყებულია მუშაობა იმისთვის, რომ სპორტის მუზეუმს შესაფერისი საგამოფენო დარბაზი ჰქონდეს.

"მას შემდეგ, რაც 2018 წელს, სპორტის მუზეუმი ეროვნულ მუზეუმში გაერთიანდა, სპორტის ექსპონატებს მზრუნველობა არ მოჰკლებია, რაც სპორტის მუზეუმის თანამშრომლების დამსახურებაა, მაგრამ ეს ექსპონატები დღემდე ეროვნული მუზეუმის ერთ-ერთ დარბაზში ყუთებშია მოთავსებული და რეალურად სპორტის მუზეუმი მხოლოდ ქაღალდზე არსებობს", — აცხადებენ სამინისტროში.

თეა წულუკიანის განცხადებით, ნინო სალუქვაძე გახლავთ ქართული სპორტის ლეგენდა, ადამიანი, რომელმაც ყველაზე კარგად იცის გამარჯვების ფასი და ის ქართული სპორტის საგანძურს ყველაზე კარგად მოუფრთხილდება.

კულტურის მინისტრის 2020 წლის 19 აპრილის ბრძანებით საქართველოს ეროვნული მუზეუმის ბაზაზე ოთხი მუზეუმი/მუზეუმთა ჯგუფი ჩამოყალიბდა, რომელთა შორის ერთ-ერთი სპორტის მუზეუმია.

ამავე გადაწყვეტილების თანახმად, მუზეუმის მმართველი ორგანო ამ მუზეუმთა/მუზეუმთა ჯგუფების დირექტორთა 4-კაციანი საბჭო გახდა. დირექტორატის საქმიანობის კოორდინაციას ეროვნული მუზეუმის გენერალური დირექტორი უწევს, თუმცა ზემოხსენებული 4 მუზეუმის/მუზეუმთა ჯგუფის ხელმძღვანელებს მათდამი დაქვემდებარებული ორგანიზაციების ფონდების, კოლექციებისა და საკადრო რესურსის მართვა დამოუკიდებლად შეუძლიათ.