ექსპრემიერი გიორგი გახარია ტელეკომპანია იმედს ისევ აკრიტიკებს და ამბობს, რომ მისი ნარკოტესტის ამბავი მტკიცებულებების გარეშე გააშუქეს. ამავდროულად, გახარია ისევ ითხოვს, რომ იმედმა ეთერი დაუთმოს, რათა გასცეს პასუხები მასთან დაკავშირებულ კითხვებზე.

"მინდა ვუთხრა ტელეკომპანია იმედის ჟურნალისტებს — გიდასტურებთ ჩემს პატივისცემას და შევდივარ თქვენს მდგომარეობაში", — ამბობს ექსპრემიერი და აღნიშნავს, რომ ტელეკომპანია "ხელისუფლების მიერ დაგეგმილ და ამუშავებულ პროპაგანდისტულ კამპანიაში" ტყუილებით ჩაერთო.

"აღარ ვსაუბრობ ცალმხრივ გაშუქებასა და იმაზე, რომ ამდენი ხნის განმავლობაში უარს ამბობთ ეთერში ჩემს მოწვევაზე, აქ უკვე ვსაუბრობ იმაზე, რომ გუშინ ავსტრიიდან ალაპარაკეთ ჟურნალისტს ის, რისი დამადასტურებელი ერთი ფაქტი, ერთი წინადადებაც კი, ვერ წარმოადგინეთ და პირდაპირ წამომიყენეთ ბრალდება. იქვე თქვით, რომ ძალიან გაინტერესებდათ, ამაზე რა პასუხს გაგცემდით.

ამიტომ, კიდევ ერთხელ მოგმართავთ, პატივი ვცეთ თქვენს მაყურებელს, ჩვენს მოქალაქეებს და მივცეთ შესაძლებლობა პირადად ჩემგან პირდაპირ ეთერში მოისმინონ ეს პასუხი. ამისთვის მზად ვარ, თქვენს არხზე დავჯდე პირდაპირ ეთერში, სადაც ექსკლუზიურად მოგიყვებით ნარკოტესტთან დაკავშირებით ოცნების მიერ დაგეგმილ სპეცოპერაციაზე და ასევე, ავსტრიაში ჩემი ერთდღიანი ვიზიტის შესახებ", — წერს გახარია.

გუშინ ტელეკომპანია იმედის ეთერში სიუჟეტი გავიდა, სადაც ჟურნალისტი ამბობდა, რომ კლინიკას, რომელშიც გახარიამ ტესტი ჩაიტარა, ნარკოლოგიური განყოფილება არ აქვს. შეგახსენებთ, რომ 17 სექტემბერს გახარიამ განაცხადა, რომ ვენის ჰოსპიტალში ჩატარებული ექსპერტიზის შედეგად, ნარკოტიკული ნივთიერების მოხმარება არ დაუდასტურდა.

აღსანიშნია, რომ ექსპრემიერმა იმედს რამდენჯერმე სთხოვა ეთერის დათმობა, 9 სექტემბერს კი ტელეკომპანიამ მას უარი განუცხადა.