მესამე ძალა — სტრატეგია აღმაშენებლის ინფორმაციით, თბილისის მერიასთან გამართულ აქციაზე მათი 2 წევრი დააკავეს, მათ შორის ერთ-ერთი მათგანი მაჟორიტარობის კანდიდატია.

როგორც პარტია ამბობს, რამდენიმე დღის წინ სამშენებლო ღობეზე საარჩევნო პლაკატების განთავსებისთვის პარტიის 3 წევრი 3000 ლარით დააჯარიმეს და აქტივისტები მერიასთან სწორედ ამის გასაპროტესტებლად მივიდნენ.

"დაჯარიმება იყო უკანონო, იმიტომ, რომ სამშენებლო ღობეზე, როგორც კანონი ითვალისწინებს, ხდებოდა ამათი გაკვრა და შესაბამისად, ჩვენი ახალგაზრდები დაჯარიმდნენ უკანონოდ. ამის გასაპროტესტებლად მოვიდნენ დღეს, უნდა შესულიყვნენ, დაეწერათ (განცხადება), გაეპროტესტებინათ და ასევე ჰქონდათ სურვილი, რომ მერს ან რომელიმე მაღალჩინოსანს შეხვედროდნენ, რაზეც სამწუხაროდ, უარი მიიღეს, არ შეუშვეს და აი, მოყვა პარტიის 2 ახალგაზრდა წევრის დაკავება, მათ შორის, ერთ-ერთი არის მაჟორიტარობის კანდიდატი", — აცხადებს სერგო ჩიხლაძე.

On.ge-მ დაკავების ფაქტთან დაკავშირებით შინაგან საქმეთა სამინისტროსთან დაკავშირება სცადა, თუმცა ჯერჯერობით უწყება ჩვენს კითხვებს არ პასუხობს.