ჯანდაცვის მინისტრის, ეკატერინე ტიკარაძის განცხადებით, იმ პირობებში, როდესაც ვაქცინცია არამარტო საქართველოს, არამედ მსოფლიოს პრიორიტეტია, მისი კამპანიური ბანერების სიძულვილის ბანერებით ჩანაცვლება კატეგიურიულად მიუღებელია.

"მე ვთვლი, რომ იმ საუკუნეში, რომელშიც ჩვენ ვცხოვრობთ და ეს ნამდვილად არის კომუნიკაციის საუკუნე, ნამდვილად მიუღებელია მსგავსი ენა და ადამიანებს უნდა შეეძლოთ ერთმანეთში ადეკვატური დიალოგის გამართვა, მითუმეტეს ამ პირობებში, როდესაც ვაქცინაცია არის არა მარტო ქვეყნის, არამედ მსოფლიოს პრიორიტეტი, ვაქცინაციის ბანერის სიძულვილის ბანერით ჩანაცვლება ჩემთვის არის კატეგორიულად მიუღებელი", — ამბობს ტიკარაძე.

მისი აზრით, ისეთი მაღალი დონის კომპანია, როგორიც ალმაა, თავადვე უნდა დაინტერესებულიყო, რამდენად სწორი ბანერით შეცვალა ვაქცინაციის ბანერი.

"ალმასგან გაცილებით უფრო გონივრული იქნებოდა, დაინტერესებიულიყო იმით, თუ რამდენად სწორი ბანერებით ჩანაცვლება ხდება მათი კომპანიის მხრიდან. ეს არის უბრალოდ რეპუტაციული, მსგავსი მაღალი დონის კომპანიისთვის, როდესაც ქვეყნის პრიორიტეტს ცვლის მსგავსი სიძულვილის ენის მქონე ბანერები", — აღნიშნა მან.

17 სექტემბერს, თბილისში გვიან ღამით ბანერი წარწერით "არა ნაცებს, არა ბოროტებას" ისევ გამოჩნდა. Facebook-ზე გავრცელდა ფოტოც, სადაც ჩანს, რომ პოლიტიკური პლაკატი ვაქცინაციის მოწოდების ბანერს გადააკრეს. 18 სექტემბერს NCDC-მა განცხადება გაავრცელა და ვაქცინაციის მოწოდების ბანერების ჩანაცვლება დაგმო.

თავად კომპანია ალმამ განცხადება გაავრცელა, სადაც განმარტავენ, რომ ფუნქცია მხოლოდ ბილბორდების კონსტრუქციის ფართის გაყიდვა/გაქირავებაა და მათ ვიზუალზე პასუხისმგებლობას იხსნიან. თუმცა, კომპანიაში, ასევე, აცხადებენ, რომ ე.წ. "სისხლიანი" ბანერების შინაარსი მათთვის მიუღებელია. კომპანიის განცხადებაში არაფერია ნათქვამი ხელშეკრულების დარღვევაზე.

გაიგე მეტი: