ეროვნული ბანკის შეფასებით, მიმდინარე წლის იანვარ-აგვისტოში უცხოური ტურიზმიდან 703,9 მილიონი აშშ დოლარი მივიღეთ, რაც გასული წლის იმავე პერიოდის მაჩვენებელს 45,6%-ით აღემატება — 2020 წლის პირველ რვა თვეში ტურიზმიდან ქვეყანაში 483,4 მილიონი დოლარი შემოვიდა.

მხოლოდ აგვისტოში ტურიზმმა 198,8 მილიონი დოლარი მოგვიტანა, რაც 2020 წლის შესაბამის თვესთან შედარებით 1 243%-ით მეტია. აქ განსაკუთრებით არის ასახული პანდემიის ეფექტი, რადგან გასული წლის აგვისტოში ტურიზმიდან 14,8 მილიონი დოლარი შემოვიდა. უნდა აღინიშნოს, რომ მიმდინარე წლის აგვისტოში, 2019 წლის იმავე თვესთან შედარებით, ტურიზმიდან მიღებული შემოსავლები 51,8%-ით არის შემცირებული.

უნდა აღინიშნოს, რომ აგვისტოში გასულ თვესთან შედარებით ტურიზმიდან მიღებული შემოსავლები 6,5 მილიონი დოლარით არის შემცირებული.

აღსანიშნავია ისიც, რომ 2020 წლის იანვარ-აგვისტოში, 2019 წლის იმავე პერიოდთან შედარებით, ტურიზმიდან მიღებული შემოსავლები 68,9%-ით არის შემცირებული, რადგან 2019 წლის პირველ რვა თვეში ტურისტულმა შემოსავლებმა 2,26 მილიარდ დოლარს მიაღწია.

ჯამში, 2019 წელს ტურიზმიდან 3,3 მილიარდის, ხოლო 2020 წელს 541,7 მილიონი დოლარის შემოსავალი მივიღეთ.

ტურიზმიდან მიღებული შემოსავლები 2019-2021 წლებში (მილიონი დოლარი)

რაც შეეხება ტურისტების რაოდენობას, 2021 წლის იანვარ-აგვისტოში საქართველოში სულ 961 572 უცხოური ვიზიტი განხორციელდა, რაც გასული წლის იმავე პერიოდის მაჩვენებელს 27,1%-ით, ხოლო 2019 წლის იანვარ-აგვისტოს მონაცემს 81,5%-ით ჩამორჩება.

მხოლოდ აგვისტოში საქართველოში 266 544 უცხოური ვიზიტი განხორციელდა, რაც პანდემიის დაწყებიდან დღემდე ერთ თვეში შემოსული ტურისტების რაოდენობის მხრივ რეკორდული მაჩვენებელია. მიმდინარე წლის აგვისტოში, გასული წლის იმავე თვესთან შედარებით, უცხოური ვიზიტების რაოდენობა 510%-ით არის გაზრდილი, თუმცა 2019 წლის აგვისტოს მონაცემს 75,5%-ით ჩამორჩება.

აღსანიშნავია, რომ ბოლო თვეების განმავლობაში როგორც ვიზიტების, ასევე ამ ვიზიტებიდან მიღებული შემოსავლების მატება შეინიშნება, თუმცა არსებული სტატისტიკით, ტურიზმის მაჩვენებლები პანდემიამდელ მონაცემებს მნიშვნელოვნად ჩამორჩება.

გაიგეთ მეტი: