საქართველოს რაგბის კავშირის განცხადებით, დავით კაჭარავა რაგბის კავშირის გამგეობის თავმჯდომარედ აირჩიეს და ახლადარჩეული გამგეობა მუშაობას შეუდგა. კაჭარავა ამბობს, რომ გამგეობის ნებისმიერი გადაწყვეტილება მხოლოდ რაგბისთვის სასიკეთოდ იქნება მიღებული.

"ჩემთვის მნიშვნელოვანია იდეა და ფასეულობა, რის გარშემოც გამგეობა შეიკრა. ეს ფასეულობაა რაგბი და მისი განვითარებისთვის ხელშეწყობა. გადაწყვეტილებებს ვიღებთ არა პიროვნებების, ან რეგიონების მიხედვით, არამედ იმისათვის, რომ ის უკეთესი იქნება რაგბისთვის. რაგბი მხოლოდ მორაგბეების კი არა, გულშემატკივრების, მთელი ქვეყნისაა და ვეცდებით ყველა ჩვენს გადაწყვეტილებაში გატარებული იყოს მათი ინტერესები", — თქვა კაჭარავამ.

რაგბის კავშირის ინფორმაციით, გამგეობის თავმჯდომარის პოსტზე დავით კაჭარავას კანდიდატურა რაგბის კავშირის პრეზიდენტმა, იოსებ ტყემალაძემ წარადგინა.