ჯანდაცვის მინისტრის მოადგილე, თამარ გაბუნია აცხადებს, რომ ვაქცინაციის კამპანიას სჭირდება გაძლიერება და არა გადაფარვა სხვა თემებით. ასე გამოეხმაურა ის ვაქცინაციის მოწოდების შესახებ ბანერების ჩანაცვლებას პოლიტიკური შინაარსის ბანერებით.

"ვაქცინაციის კამპანიას სჭირდება კიდევ უფრო მეტად გაძლიერება და არა გადაფარვა ნებისმიერ სხვა, ალტერნატიული თემით, რაც არ უნდა მნიშვნელოვანი იყოს ეს თემა — გნებავთ სოციალური, გნებავთ ეკონომიკური და გნებავთ პოლიტიკური მიზნებიდან გამომდინარე. ამდენად ის, რომ ვაქცინაციის კამპანია სრული სიმძლავრით უნდა გაგრძელდეს, ცალსახაა. ჯანდაცვის სამინისტრო, დაავადებათა კონტროლის ცენტრი ამ პოზიციას ემხრობა", — განაცხადა თამარ გაბუნიამ.

გაბუნიამ, ასევე, თქვა, რომ ჯანდაცვის სამინისტროს პოზიცია ვერ იქნება პოზიტიური ისეთ ქმედებებზე, რომელიც ნებსით თუ უნებლიეთ აზარალებს ვაქცინაციის პროცესს.

"ჯანდაცვის სამინისტროს პოზიცია როგორ შეიძლება იყოს პოზიტიური იმგვარ ქმედებასთან მიმართებაში, რომელიც ნებსით თუ უნებლიეთ აზარალებს ამ კონკრეტულ შემთხვევაში ვაქცინაციის პროცესს. რა მოხდა, რატომ მოხდა და რამდენად ხელშეკრულების პირობები დაირღვა თუ არ დაირღვა, ამაზე ორი მხარე იმსჯელებს და შეთანხმდება და დაავადებათა კონტროლის ცენტრს აქვს ეს საკითხი უკვე წამოწეული და დაწყებული", — აცხადებს თამარ გაბუნია.

მისი თქმით, "გასაგებია" რომ მედიამ აქცენტი გააკეთა ბანერების ჩანაცვლებაზე, მაგრამ, აცხადებს, რომ უკეთესი იქნება, თუ მეტი აქცენტი გაკეთდება უშუალოდ ვაქცინაციის კამპანიის გაშუქებაზე.

17 სექტემბერს, თბილისში გვიან ღამით ბანერი წარწერით "არა ნაცებს, არა ბოროტებას" ისევ გამოჩნდა. Facebook-ზე გავრცელდა ფოტოც, სადაც ჩანს, რომ პოლიტიკური პლაკატი ვაქცინაციის მოწოდების ბანერს გადააკრეს. დედაქალაქის შემდეგ ბანერი წარწერით "არა ნაცებს, არა ბოროტებას" საქართველოს სხვა ქალაქებშიც გააკრეს.

დაავადებათა კონტროლისა და საზოგადოებრივი ჯანმრთელობის ეროვნულ ცენტრში აცხადებენ, რომ ამ პროცესთან კავშირი არ აქვთ და თუ სიმართლეს შეესაბამება, გმობენ ამ ფაქტს.

გაიგე მეტი: