ქართული ოცნების თავმჯდომარის, ირაკლი კობახიძის თქმით, როდესაც ერთი მხრიდან მოედინება სიძულვილი, შეიძლება მეორე მხრიდანაც იყოს პასუხი. აღნიშნულ განცხადებას პარტიის თავმჯდომარე "სისხლიან" ბანერებთან დაკავშირებით აკეთებს.

"სამწუხაროდ, ამ არჩევნებში ისევე როგორც წინა არჩევნებში სიძულვილის ენა ზიზღი აგრესია არავის უკვირს, თქვენ იცით ვინ არის მთავარი წყარო. მთავარი წყარო ამ ყველაფრის, ეს არის 3 კონკრეტული ტელევიზია, რომელიც მუდმივად აღვივებს სიძულვილის ატმოსფეროს ჩვენს ქვეყანაში, ამას ცდილობენ ყოველ შემთხვევაში, ნაწილობრივ წარმატებით გამოსდით. სამწუხაროა ეს ყველაფერი, ბუნებრივია როდესაც ერთი მხრიდან მოედინება ამდენი სიძულვილი, შეიძლება სხვა მხრიდანაც იყოს პასუხი", — თქვა ირაკლი კობახიძემ.

კობახიძის აზრით, „არა ნაცებს“, „არა ბოროტებას“ და „არა ღალატს“ — სამივეს ავტორები და სულის ჩამდგმელები არიან პირები, რომელიც იქ არიან გამოსახული.

"გაჟღერებულ სლოგანს, რაზეც არის საუბარი, პირველი არის არა ნაცებს, მეორე არის არა ბოროტებას და მესამე არის არა ღალატს. რა თქმა უნდა, სამივე ჩემთვის არის პრინციპულად მიუღებელი და ვეთანხმები ზოგადად იმას რომ ერთის, მეორეს და მესამეს ავტორები და სულის ჩამდგმელები საქართველოში არიან რეალურად ის პირები, რომლებიც იქ არიან გამოსახულები", — აღნიშნა ირაკლი კობახიძემ.

17 სექტემბერს, თბილისში გვიან ღამით ბანერი წარწერით "არა ნაცებს, არა ბოროტებას" ისევ გამოჩნდა, თუმცა ამჯერად გიორგი გახარიას ფოტო დაამატეს, წარწერას კი "არა ღალატს". დედაქალაქის შემდეგ ბანერი წარწერით "არა ნაცებს, არა ბოროტებას" საქართველოს სხვა ქალაქებშიც გააკრეს.

ბანერზე გამოსახული არიან ექსპრეზიდენტი, მიხეილ სააკაშილი, ნაციონალური მოძრაობის თავმჯდომარე, ნიკა მელია, პარლამენტის წევრი, გუბაზ სანიკიძე, ევროპული საქართველოს თავმჯდომარე, გიგა ბოკერია, მთავარი არხის გენერალური დირექტორი, ნიკა გვარამია, TV პირველის საინფორმაციო სამსახურის ხელმძღვანელი, ნოდარ მელაძე, გირჩი — მეტი თავისუფლების ლიდერი, ზურაბ ჯაფარიძე და ყოფილი პრემიერმინისტრი, გიორგი გახარია.

წარწერა: "არა ნაცებს, არა ბოროტებას" თბილისში პირველად 2018 წლის ნოემბერში, საპრეზიდენტო არჩევნების წინ გამოჩნდა. მაშინ სარეკლამო ბილბორდზე ნაციონალური მოძრაობის ყოფილი და მოქმედი ლიდერების ფოტოები იყო გამოსახული, წარწერაზე კი სისხლი ჩანდა. ამ თემაზე საუბრისას ქართულ ოცნებაში ამბობდნენ, რომ ბილბორდი მათი დაკვეთით არ გაკეთებულა და კერძო ინიციატივაა, თუმცა ამის თაობაზე ინფორმირებული იყვნენ.

რამდენიმე დღეში ბილბორდებზე გამოჩნდა ახალი ფოტო, სადაც ენმ-ის საპრეზიდენტო კანდიდატის, გრიგოლ ვაშაძის სახეების უკან ყოფილი მაღალჩინოსნების სახეები იყო შესაბამისი წარწერებით: "ირჩევ ვაშაძეს, იღებ სააკაშვილს!", "ირჩევ ვაშაძეს, იღებ ახალაიას!", "ირჩევ ვაშაძეს, იღებ ქარდავას!", "ირჩევ ვაშაძეს, იღებ ვაშაძეს!".

24 ივლისს თბილისის ქუჩებში ბანერები წარწერით: "არა ნაცებს, არა ბოროტებას" კვლავ გამოჩნდა, თუმცა ამჯერად ჰომოფობიური შინაარსით. წინა შემთხვევებისგან განსხვავებით, ამჯერად ბანერზე გამოსახული იყო არა მხოლოდ რომელიმე პოლიტიკური ლიდერი, არამედ კრიტიკული ტელევიზიების ხელმძღვანელები, ასევე, თბილისი პრაიდის დამფუძნებელი გიორგი თაბაგარი და სირცხვილიას აქტივისტი, გიგა მაქარაშვილი.