შინაგან საქმეთა სამინისტროს განცხადებით, 33 წლის უცხო ქვეყნის მოქალაქე ნარკოტიკული დანაშაულისთვის დააკავეს. შსს-ს ცნობით, გამოძიებით დადგინდა, რომ ბრალდებული ინტერნეტით ნარკოტიკების რეალიზაციის სქემაში იყო ჩართული.

"კერძოდ, მან უკანონოდ შეძენილი ნარკოტიკული საშუალება ალფა-პვპ-ის შემცველი ნარკოტიკი, შემდგომი გასაღების მიზნით, ნაძალადევის რაიონში, სხვადასხვა ადგილზე განათავსა და მათ ადგილმდებარეობას ფოტო გადაუღო", — ნათქვამია უწყების განცხადებაში.

შსს-ს ინფორმაციით, სამართალდამცველებმა თბილისში, ბრალდებულის პირადი და დროებითი საცხოვრებელი სახლის ჩხრეკის შედეგად, ასევე, საგამოძიებო ექსპერიმენტისას, რ.ვ.-ის მიერ სარეალიზაციოდ გამზადებული, ალფა პვპ-ს შემცველი ნახევარ კილოზე მეტი ნარკოტიკული ნივთიერება ნივთმტკიცებად ამოიღეს.

მათივე ცნობით, გამოძიება საქართველოს სისხლის სამართლის კოდექსის 260-ე მუხლით მიმდინარეობს.